AHATA ta reacciona riba asesinato den zona turistico: “Prevencion di crimen ta clave”

ORANJESTAD  - Relaciona cu caso di tiramento ayera nochi unda cu un persona a keda asesina den zona turistico na Palm Beach, Tisa LaSorte, Presidente y CEO di Aruba Hotel & Tourism Association (AHATA) a reacciona awe mainta: “Nos ta aprecia polis su accion y detencion rapido”. Manera ta conoci, polis a raporta cu un persona relaciona cu e caso tabata deteni. Y e hecho cu e caso a tuma lugar mei mei di e zona turistico, na Palm Beach, e tin atencion di e asosacion hotelero, mirando e implicacion cu esaki por tin pa cu nos turismo.“AHATA ta manda mensahe di profundo condolencia na famia di e victima” LaSorte a sigui bisa. “AHATA lo sigui den dialogo cu KPA y Aruba Hospitality & Security Foundation tocante metodonan di prevencion di crimen na Aruba. Pa seguridad di nos comunidad y nos economia, prevencion ta esencial” e presidente di e asosacion hotelero a reacciona finalmente.