Arends: Subida di tarifa pa autobus no ta drenta na vigor awe mas!

ORANJESTAD – E subida di tarifa cu 1 Florin pa autobus nota drenta na vigor awe mas! Asina minister di transporte Ursell Arends a confirma e siman aki. Segun e mandatario, durante e ultimo dianan a tuma nota di diferente expressionnan di parti di chauffeurnan di autobus chikito encuanto e subida di tarifa cu 1 Florin, indicando cu lo kier cuminsa cobra esaki entrante 1 di december 2022. Pero e proceso legal pa regla e tarifa nobo no ta finalisa ainda segun e mandatario.

CONTESTA POSITIVO

E mandatario a recorda cu dia 18 juli, gobierno a duna un contesta positivo riba un peticion pa subi tarifa cu 1 florin. Esaki a bin tres dia despues di a ricibi un carta  di chauffernan di autobus, fecha 15 di juli. Den e carta e chauffernan a expresa nan preocupacionnan y alabes entrega un peticion pa aumento di tarifa, en conexion cu entre otro e aumento di prijs di gasolin y diesel mundialmente. Den tres dia Gobierno a aproba esaki y den un carta a splica tur e consideracionnan y cu Minister di Transporte ta sostene e cambio di tarifa. Di biaha a inicia tambe cu e proceso legal pa haci esaki realidad.

REUNION

Despues di e fecha aki a reuni na varios ocasion cu representantenan di chauffeurnan di autobus. Tanto den e carta como den e combersacionnan a splica cu Aruba ta un estado di derecho y tur hende mester observa ley. E proceso legal pa haci e cambio di tarifa tin cu cana su caminda via diferente departamento y institucion. Ta nifica cu maske di parti di Ministerio e proceso a wordo atendi cu tur prioridad, e parti legal di e proceso por dura algun luna. Actualmente esaki ta den su fase final y ta premira cu e proceso lo keda cla den un pa dos siman.

SEÑAL ERONEO RIBA RED SOCIAL

Esnan cu ta manda señalnan riba red social y medionan di comunicacion segun e mandatario, ta indica cu lo ahusta e prijs di autobus sin cu e proceso legislativo a termina oficialmente, ta haci algo no aceptabel. Autobus cu cobra mas di locual e maximo cu ley ta prescribi ta actua contra ley y tambe ta den violacion di e condicionnan di permiso. Integridad ta exigi cu nos mester tene nos mes na leynan y procesonan. Esaki ta conta pa e minister, departamento y institucionnan gubenamental, y tambe e ciudadano. E tarifa nobo lo drenta na vigor conforme ley y despues di publicacion.

VIOLA LEY

Ademas, e mandatario ta sigui bisa, esnan cu cobra un tarifa cu aumento entante 1 di december 2022 ta violando ley vigente y tambe ta viola un condicion di nan permiso di autobus.  Usuarionan cu wordo cobra un aumento di 1 Florin prome cu e tarifa nobo ta na vigor legalmente, por informa Departamento di Transporte Publico (DTP) riba nan tiplijn 5948660 (yamada of WhatsApp) of via info@dtp.gov.aw.