Caya Libertador Betico Croes (Caya Grandi) ta habri pa trafico di motor atrobe awe!

ORANJESTAD – Seis aña despues cu e gabinete di otro signatura (Mike Eman) a habri Caya Grandi (Caya Libertador Betico Croes) bek pa 2 siman pa trafico di motor, awe e gabinete actual a dicidi pa habri e Caya Grandi atrobe pa un luna. Esaki kier men cu pa un luna, vehiculonan di motor, y no tram, lo por trafica den e caya. Contrario na e cambio di 6 aña pasa, trafico di motor por pasa henter dia den Caya Grandi. E motibo ta pa asina trece mas bida den Caya Grandi, specialmente den temporada di fin di aña, y pa esaki traduci tambe den mas benta pa e negoshinan. 

CERA CAYA

Tabata 13 aña pasa na 2009 cu e gabinete di signatura Eman a cera Caya Grandi pa trafico di motor, pa introduci e conocido tram. E intencion tabata pa tin algo diferente y un ‘trekpleister’ pa trece turistanan mas tanto for di waf pa Caya Grandi. Esaki sinembargo no a resulta manera cu a spera. Asina mes a sigui cu e idea. Shete aña despues, na mitar di December di 2016, a dicidi pa habri esaki bek pa trafico, pa un periodo di dos siman, pero entre 6’or di atardi pa mainta 3’or di marduga. Gobierno e tempo ey a splica cu asina nan ta cumpli cu peticion di comerciantenan y ciudadanonan preocupa cu kier a mira un cambio. Gobierno a uza un ceremonia pa haci esaki, uzando autonan clasico.  Na januari 2017 a bolbe cera e trafico bek pa motor y laga tram sigui core. NoticiaCla.com e tempo ey a tuma nota cu mayoria tienda den Caya Grandi ta totalmente cubri cu seya hero, of rolluiken, y cu apenas 23 tienda ta visibel pa por logra e efecto di 'windowshopping' manera cu gobierno kier a logra despues .