ATIA: Contra “Exchange Rate Margin Compensation”

ORANJESTAD – E gremio comercial mas grandi di Aruba Aruba Trade and Industry Association (ATIA) ta ‘absolutamente contra e Exchange Rate Margin Compensation”. Den un comunicado emiti ayera, nan ta mustra cu nan a tuma nota di e “Exchange Rate Margin Compensation” cu a drenta na vigor desde 1 di april 2015. E obhetivo primordial di e ley aki ta pa cubri gasto operacional di Banco Central. ATIA ta contra, paso esaki ta significa un aumento di gasto pa comerciantenan cu ta importa productonan, locual ta bay tin efecto riba e poder di compra di nos ciudadanonan.

FALTA DI CONSULTA

Na prome luga ATIA ta lamenta di no a wordo involucra ni consulta mirando cu e ley aki lo tin efecto pa su miembronan. Na di dos luga ATIA ta lamenta e manera con e ley aki a wordo trata y aproba den Staten. E silencio y rapidez den cual e ley a wordo pasa ta duna e impresion cu no ta tur interes a wordo tuma debidamente den consideracion. E siguiente preguntanan ta surgi: Kico ta e posibel efecto riba inflacion? Sigur mirando introduccion di diferente otro medidanan ultimo tempo. Dicon partnernan social no a wordo consulta? Acaso no tawatin otro alternativa? Talbes cu Banco Central mes por a haci un esfuerso pa baha su gasto operacional?

CARTERA DI HABITANTE

Manera menciona e “Exchange Rate Margin Compensation” lo wordo sinti den tur cartera di nos habitantenan. Sigur mirando cu casi tur nos productonan di consumo ta bin di exterior. Esey kiermen cu ora importa mester manda paga mercancia den exterior, cual ta causa un fluho basta grandi di compra di “foreign Exchange”. Pa Banco Central e placa aki lo sirbi di bon, pero pa comercio esaki lo percura pa mas gasto y ta crea inkietud den mundo comercial. ARUBA TA BIRA MAS CARO

ATIA ta lamenta cu di e manera aki Aruba lo keda bira mas caro, haciendo nos pais dia pa dia menos atractivo pa haci negoshi y pa inversionistanan bin establece nan mes aki. Por ultimo, ATIA ta spera cu den futuro reformanan necesario pa stimula nos economia, pa asina comercio por inverti y crea mas cupo di trabou, por bira ley den mesun rapidez cu e ley riba “Exchange Rate Margin Compensation”.