Un arubiana ta fortifica CFT na Corsou awor

WILLEMSTAD – Manera raporta ayera caba, for di comienso di luna, College Financieel Toezicht (CFT) ta conta cu un colaborado nobo. Loke ta haci e caso aki interesante, ta e hecho cu ta trata di un persona di Aruba, -ex politico Nadya van Putten-, cu na 2009 a representa su isla den eleccionnan europeo riba e lista di Groen Links. Y te cu dos siman pasa ainda, van Putten tabatin un funcion halto na St Eustatius.

FUNCION DEN CFT

Ademas, mirando e acercamento cu CFT tin ultimo tempo cu Aruba, tabatin e percepcion cu van Putten lo a bira e ‘representante di Aruba’ den e College. Esaki sinembargo no ta e caso. “Nadya ta simplemente un colaborado nobo di CFT” Kees van Nieuwamerongen a splica NoticiaCla.com ayera. “E ta conoci, y pesey ta hayando mas atencion. Pero e no ta otro cu un cambio regular di colaborado” e secretario di CFT a sigura NoticiaCla.com. Pa awor van Putten lo ocupa su mes manera tur otro colaborado, riba tur tereno pues cubriendo tanto Corsou, St Maarten y eventualmente Aruba. Pero segun e secretario den un otro declaracion na e matutino di Corsou, -Algemeen Dagblad-, (AD), eventualmente e (van Putten) lo atende Aruba specificamente. E forma cu CFT lo funciona na Aruba, no a wordo determina politicamente, y como tal unabes cu esaki keda estableci, e lo haya un forma mas concreto.

OPORTUNIDAD

Pa loke ta Nadya van Putten mes, e ta sumamente contento cu e oportunidad aki. Aunke cu e no ta traha fisicamente na Aruba, e ta contento cu maske ta asina e por aporta cu su isla natal. Despues di e eleccion pa parlamento europeo na 2009, unda cu e la representa Aruba pa GroenLinks, e la keda traha pa nan un tempo, y despues for di 2013 te cu dos siman pasa, tabata director Finanzas y Personeelszaken.na St Eustatius. Dia 1 di april di e aña aki e la acepta e funcion nobo na Corsou. "Mi meta den mi carera professional semper tabata pa yuda nos islanan hulandes caribense bay dilanti” van Putten a bisa NoticiaCla.com. “ Ta un honor grandi di por traha den un function na unda mi por traha riba e bienestar financiero di mi pais natal Aruba” e la bisa finalmente.

CFT Y ARUBA

CFT recientemente ,-riba peticion di gobierno di Aruba-, a duna su conseho riba e presupuesto 2015 di pais Aruba y awor nan ta en espera kico a sosode proximamente ora cu Parlamento trata esaki.