Union Europeo por elimina visa pa colombianonan fin di 2015

LIMA – Mientras cu Aruba ainda no a dicidi si nan ta conseha Hulanda pa ‘elimina’ visa pa colombiano bishita nos isla, Union Europeo ta cla pa nan si tuma e paso ey. Por lo menos segun e vicepresidente di camara di diputado di Spaña Javier Barrero Lopez, NTN24 ta raporta. Segun Barrero, final di december lo drenta na vigor, e vigencia di convenio cu ta exclui visa pa peruano y colombiano como rekisito pa biaha pa Union Europeo. Aki na Aruba ainda e decision mester wordo tuma.

INICIATIVA

E eliminacion di e exigencia di visa pa colombiano y peruano, tabata un iniciativa di augustus 2013 pa e presidente di e gobierno spaño, Mariano Rajoy.

ELIMINACION VISA TEMPORAL Parlamento europeo aña pasa den forma mayoria a aproba eliminacion di visa pa bishita di duracion cortico te 3 luna, den teritorio di Union Europeo, pa ciudadanonan di Colombia y Peru. Awor nan ta den tramite pa firma e convenio nobo y despues tramita e parlamentarionan pa haci e cambio necesario posibel. “Nos ta confia cu esaki por tuma lugar pa final di december”.

DECISION ARUBA

Na Aruba e decision si ta kita visa pa colombianonan ainda no a wordo tuma. Den un declaracion recien di prome minister Mike Eman na NoticiaCla.com, e la confirma cu e decision ainda tin cu wordo tuma, y cu esaki lo sosode proximamente. Pero e indicacion ta cu e lo no cambia mucho di e maneho actual, esta cu e visa lo keda vigente pa colombianonan drenta Aruba. No a duna informacion respecto e parti di visa pa Peruanonan pa Aruba.