Aruba den top 15 isla mas atractivo den Caribe pa biba

ORANJESTAD – Aruba ta riba e lista di 15 isla di Caribe mas atractivo pa biba, aunke cu e posicion no ta mucho halto. Apenas ubica riba posicion 11, despues di Guadeloupe y prome cu Corsou y Barbados, e ta keda un hecho cu Bonaire ta sigui surpasa nos isla riba e punto aki. E sondeo, -cu ta aparece riba e website Caribbean Journal-, ta postula e 15 islanan di Caribe mas miho pa bo biba ariba, usando un cantidad di criteria specifico. St Maarten su parti Frances ta lidera e grupo di 15 isla. Bonaire ta number 5 y Corsou ta net despues di Aruba, riba posicion 12.

CRITERIA

E sondeo ta basa riba e gana di hendenan pa biaha y muda pa un isla den Caribe. E criterionan ta basta amplio, y ta varia di si ta un isla keto, desaroya, of metropolitano, y si e ta apto pa un lugar di vacacion of di biba part time. “Cada uno tin su beneficionan y su reglanan cu por ta un reto pa hopi”. Teniendo tur esaki na cuenta, a crea un lista di 15 isla cu a keda comparti, unda cu ta describi cada merito di cada isla.

ARUBA

Pa Aruba, e beachnan spectacular pafo di e faha di horcan ta un bon punto. E conectividad tremendo for di Merca, particularmente Noord Oost, ta atractivo. E ta un isla moderno, pero cu no a lubida su pasado. Un diversificacion total di continente, un melting pot pa loke ta cultura, cuminda, y e ‘isla cu ta birando esun mas berde den Caribe’. Esey ta pone cu Aruba ta riba e lista, pero, na number 11.

BONAIRE

Pa Bonaire, fuera di e posicion pafo di e faha di horcan, su parti di sambuya, y un energia hoben y dinamico, loke ta resalta ta e ‘respaldo di standard hulandes’.Foto cortesia Caribbean Journal.