Aruba ta registra di 11 morto den trafico pa 2022

Aruba ta registra di 11 morto den trafico pa 2022

Posted on 11/27/2022 6:23 am AST | Updated on 11/27/2022 6:25 am AST

ORANJESTAD - Diadomingo madruga pa mas o menos 02:05 central di polis a wordo notifica di un accidente frontal entre dos auto na altura di All To Car na Ponton. Na yegada di patruya di polis a bin encontra cu un accidente basta fuerte entre un Susuki Baleño blanco A-32334 y un pick-up Toyota Tacoma shinishi A-3851.

E chauffeur di e Susuki Baleño Blanco tabata mustra hopi grave y a pido ambulance cu maximo urgencia. A pidi materialwagen di Brandweer mirando cu e chauffeur di e Susuki Baleño tabata pega den e auto. Ambulance a yega na e sitio di e sucedido pero lamentablemente no por a haci nada mas pa e chauffeur.

Pa 2:40 dr Texier a constata morto di Domingo Encarnacion Heredia naci 28-01-1977 (45 aña) na Republica Dominicana.

Polis di trafico a presenta na e sitio como tambe polis technico y a tuma e investigacion pa determina exactamente kiko por a pasa.

Slachtofferhulp a presenta pa asina guia e famia den e momento dificil aki.

E chauffeur di e Toyota Tacoma a wordo transporta pa hospital .y su situacion ta stabiel.

NoticiaCla y Cuerpo Policial ta manda palabra di condolencia na famia di e fayecido.

  • Powered by SETAR