Corte a disolve contracto di director di FLPD sin compensacion financiero

ORANJESTAD – Corte a disolve e contracto di director di Fundacion Lotto pa Deporte (FLPD) Roland Tuitt, sin compensacion financiero pa e retiro. E disolvimento di contracto ta drenta na vigor entrante 23 di november proximo y e gastonan di corte ta core pa cuenta di sr Tuitt tambe. E caso a keda entama pa FLPD, y den e caso aki, mientras cu sr Tuitt no a disputa e disolvimento di contracto, e la bringa pa esaki sosode cu compensacion conforme contracto. Huez no a bay di acuerdo cu esaki. 

RETIRO

E peticion pa disolvimento di contracto, segun FLPD ta pasobra e.o. no tin confiansa mas den sr Tuitt, y cu sr Tuitt no a cumpli cu su funcion di director, cu tabata entre otro pa mehora e situacion financiero di e compania y drecha e maneho interno. Ora cu sr Tuitt a cuminsa cu su labornan na 2019, e compania lo tabatin un debe na gobierno di por lo menos 17 miyon florin, y asina tabatin un cantidad di problema interno cu e compania. Segun documentonan di corte, durante e periodo cu sr Tuitt a labora den su funcion, cos no a drecha y ta papia te hasta di cu e la bira pio. FLPD a suma varios motibo pa motiva su peticion pa disolve e contracto, y esaki tabata suficiente pa corte determina su decision. Manera a splica caba, sr Tuitt no a disputa e disolvimento, sino cu e tabata kier compensacion financiero bay hunto cu e disolvimento. Algo cu corte no a bay di acuerdo cu ne. Por click AKI pa lesa e sentencia completo.