AZV, riba ordo di minister, a suspende recorte di 5.5% pa un luna na proveedornan!

ORANJESTAD – Proveedornan di servicio medico a haya un ‘sorpresa’ diaranson, ora cu nan a ricibi un carta di AZV cu ta informa nan cu ‘debi cu nan a haya un instruccion nobo di minister’, cu ‘lo no ta kita 5.5% di e pagonan di servicio medico den luna di december’. Esaki ta nifica cu pa e luna di December, e proveedornan lo ricibi mas placa pa nan servicio. E carta di AZV no ta menciona pakico a opta pa suspende e recorte pa December 2022. Loke AZV a aclarea si, ta cu e recorte ta basa riba declaracionan ya haci, pues no ta pa declaracionan cu lo wordo haci na December 2022. E suspension di recorte ta conta pa e proximo pago na proveedornan cu nan lo ricibi  pues na december di e aña aki. Click AKI pa lesa e carta firma pa director di AZV, Edwin Jacobs.