Andin Bikker: Segun quick scan, presupuesto 2014 no ta sirbi

ORANJESTAD – Bo no por yam’e un presupuesto mas. Lider di partido Democracia Real Andin Bikker refiriendo na e resultado di e quick scan dialuna. Segun Bikker, e quick scan a sali malisimo pa gobierno. Prome reaccion di lider di Democracia Real, Andin Bikker. E no kier uza e palabra devastador, pero asina e ta interpreta e rapport. Segun Bikker, e ta determina practicamente cu e presupuesto 2014 no ta sirbi. Bikker ta sigui citando varios parti. Palabranan manera ‘outdated’, ‘irealistico’ ta algun cu e ta referi na dje. E maneho financiero no ta na ordo di Aruba. Asina Bikker ta sigui cita e rapport.

Bikker ta culpa gobierno di Aruba cu a sigui fia aña tras aña, creando debenan astronomico. “Increibel” e ta sigui bisa. “Awor ta wordo constata cu no tin reserva y no tin caminda di bay fia” e lider politico ta sigui bisa. E no tabatin niun palabra bon pa e rapport cu a sali dialuna. E ta sigui mustra cu e rapport ta asina malo, cu miho inverti energia den esun di 2015, manera cu gobierno mes a bisa caba. “Bo a keda sinta den 4e klas pero nos ta laga bo bay 5e klas toch pasobra nos no sa kico bo ta bay sigui haci den 4e klas”. E forma crioyo semper di Bikker di analisa cos. Finalmente, Bikker ta mustra cu ta incomprendibel cu ta entrega un presupuesto coriente di un pais, den luna 7. “Bo no por yama esaki un presupuesto mas.