BCA: Activo domestico netto a subi mientras cu e reserva di divisa netto a baha

BCA: Activo domestico netto a subi mientras cu e reserva di divisa netto a baha

Posted on 11/23/2022 10:35 am AST | Updated on 11/23/2022 10:37 am AST

ORANJESTAD - Den september 2022, e cantidad di placa den circulacion a expande cu Afl. 17,3 miyon te na Afl. 5.394,3 miyon, compara cu augustus 2022. Esaki a resulta for di un subida den e activo domestico netto (+Afl. 189,9 miyon) y un bahada den e reserva di divisa netto (-Afl. 172.6 miyon). 

E expansion den e activo domestico netto a wordo causa pa un aumento den credito domestico (+Afl. 193,6 miyon) y un bahada den transaccionnan no relata na credito (-Afl. 3,7 miyon). E subida den credito domestico a wordo empuha pa un crecemento den credito bancario netto na e sector publico (+Afl. 178,5 miyon) y mas credito bancario na e sector priva (+Afl. 15,0 miyon). E aumento den credito bancario netto na e sector publico ta wordo atribui na un bahada den deposito di gobierno (-Afl. 184,6 miyon). E crecemento den credito bancario na e sector priva a wordo causa pa mas credito na empresa (+Afl. 8,7 miyon), hipoteca pa vivienda (+Afl. 4,1 miyon), y credito na consumidor (+Afl. 2,2 miyon).   

Na september 2022, e bahada den e reserva di divisa netto a wordo causa pa benta netto di divisa di Afl. 452,8 miyon na publico, primordialmente relaciona cu e asina yama “portfolio investment” y pago pa importacion.

Esaki a wordo parcialmente mitiga pa compra netto di divisa di Afl. 280,2 miyon di publico, principalmente relaciona cu entrada for di turismo.

INFLACION

E nivel general di prijs, cu ta wordo midi door di e indice di prijs di consumo, a registra un subida di 7,0 porciento den e luna di september 2022, compara cu september 2021. E contribuyentenan principal na e aumento aki tabata e categorianan  “Transporte” y “Vivienda”.  Pa loke ta trata e promedio anual di e tasa di inflacion, esaki a registra 4,7 porciento na september 2022, compara cu 4,3 porciento na augustus 2022. 

ENTRADA DI GOBIERNO

Entrada total di gobierno a suma Afl. 97,7 miyon na september 2022, cual ta Afl. 8,9 miyon mas cu e mesun luna di e aña anterior. Esaki a resulta for di un subida den entrada di impuesto (+Afl. 14,5 miyon) y un bahada den entrada no relata na impuesto (-Afl. 5,6 miyon). 

E aumento den entrada di impuesto a wordo causa principalmente pa mas entrada for di e asina yama “turnover tax” (B.B.O.,B.A.V.P.), impuesto riba importación (+Afl. 3,2 miyon), impuesto riba salario (+Afl. 2,6 miyon), impuesto riba propiedad  (+Afl. 2,2 miyon), y e asina yama “transfer tax” (+Afl. 2,1 miyon). 

TURISMO

Na september 2022, e cantidad di turista a registra 78.261 turista, cual ta 17.968 mas bishitante (+29,8 porciento) compara cu na september 2021. E mercadonan Norte Americano, Latino Americano, y Europeo a subi cu 10.723 bishitante (+22,2 porciento), 3.226 bishitante (+62,5 porciento), y 2.843 bishitante (+54,1 porciento), respectivamente. 

 

  • Powered by SETAR