Seleccion di landamento a sali pa e competencia di CONSANAT Peru

ORANJESTAD - Despues cu a logra un di 6 luga den e clasificacion final como tambe un cantidad grandi di 35 medaya, di cual 10 oro, 13 plata y 12 brons mas 1 Highpoint Trophy y kibrando un total di 4 record durante di e competencia CARIFTA na e pais di Barbados, e seleccion di landamento di Aruba a sali pa otro competencia e biaha aki esun di CONSANAT cu lo tuma luga na Lima, Peru. Den e competencia Suramericano di landamento hubenil, e seleccion di Aruba lo mester enfrenta e fuerte competidonan di e paisnan Suramericano. Contrario na e seleccion cu a competi na Carifta, e biaha aki e delegacion di landamento lo consisti di 9 atleta, e mayoria a competi na Carifta. Den e categoria di 13-14 nos tin Anahi Schreuders - Keeley Maduro - Florence Kock y Elisabeth Timmer esaki femenino. E representantenan masculino lo ta Brandon Cheong y Daniel Jacobs. Por ultimo den e categoria di 15-17 aña femenino nos tin Rebecca Maduro, mientras den esun masculino nos tin Patrick Groters y Mikel Schreuders. Por bisa cu pa prome biaha lo bay tin e competencia di relay mixto (2 mucha homber y 2 mucha muher) den CONSANAT y Aruba lo tin un mixed relay den e categoria di 13-14 aña y uno di mucha muher relay 13-14.