ORANJESTAD - HOH a haci su prome cirugia di osteointegracion. Amputacionnan di pia ta wordo ehecuta pa basta tempo caba na Horacio Oduber Hospital (HOH). Pero recientemente, esta fin di October, a realisa un otro primicia mas na HOH unda a opera un pashent pa prome biaha na Aruba hacienda uzo di e tecnica yama osteointegracion. Esaki ta un tecnica di cirugia nobo unda ta introduci e protesis den e weso y ta integra esaki cune (tecnica di integracion). E protesis ta sali di e cuero y asina tin un conexion directo cu e protesis di cana pa asina tin un control mas preciso na momento di cana. Pues e uzo di un ‘prothesekoker’ lo no ta necesario mas. Problemanan di e ‘prothesekoker’ ta e motibo mas grandi pa un operacion asina
E experiencianan mundialmente ta hopi bon y e operacion aki ta mehora e calidad di bida di hopi pashent. Ciruhanonan di HOH (dr. Caroline Hoenders, ciruhano ortopedico y dr. Yuri Casseres, ciruhano general) y dr. Oscar van Waes, ciruhano traumatologo di Osseointegration Center Rotterdam a colabora intensivamente cu resultado masha satisfactorio.
E prome pashent cu a ricibi e operacion aki na Aruba ta cuminsa awo (despues di dos siman) poco poco para riba su pia di protesis. E pashent tabata pura pe momento yega y ta hopi contento cu e resultadonan. Claro cu semper tin chens pa haya complicacion, cual den porcentahe ta comparabel cu e operacionnan di rudia y heup. Dr. Van Waes a bin specialmente Aruba pa dirigi y guia e evento historico aki pa HOH y ta hopi content cu e colaboracion.
Meta ta pa den futuro sigui amplia y intensifica e cooperacion pa asina yega na un “Osseointegration centre of the Antilles” (OCA). E prome pashent awo lo cuminsa cu su trayecto di rehabilitacion pa asina perfecciona su canamento.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.