Corte a sentencia asesinonan di Frans Angela na 18 aña di prizon cada un

ORANJESTAD – Corte a sentencia sospechosonan J.B. y W.W. na 18 aña di castigo di prison, cada un pa asesinato di Frans Angela na Zeewijk. Segun huez, a keda comproba cu B y W. hunto y premedita a mata sr. Angela. Huez a tene cuenta cu seriedad di echo y e manera cruel cu a mata sr. Angela. Segun e huez, no por imagina con su ultimo momentonan tabata, famia a keda tras cu bashi y tristeza grandi. Huez a tene cuenta tambe cu castigonan di Hof den otro casonan parecido, y cu no por tene nan full responsbel pa nan actonan. Pesey a dicidi pa baha e castigo pidi di 25 aña pa 18 aña. Asina mes, hopi ta considera e cantidad hopi ainda. 

E CASO

Tabata fin di October ultimo (28), cu Ministerio Publico (OM) a exigi castigonan di prison di respectivamente 25 y 23 aña largo contra e sospechosonan J.N.C.B. y W.A.W. pa e asesinato di Francisco Angela (79) na Zeewijk. E sospechoso C.B. (24 aña) y e sospechoso W. (35 aña) a wordo acusa di a tuma bida di e victima na un forma extremadamente violento riba 17 di maart 2022. Ambos a wordo acusa ademas di ladronicia di auto di señor Angela, su yabi di switch y un suma di placa cu tabata pertenece na dje.