Conocido luchadora contra cancer di pecho, Myandra Croes a bay sosega

ORANJESTAD – Despues di un periodo di 3 aña (December 2019) di a keda diagnostica cu e malesa cancer, specificamente cancer di pecho (Metastatic Breast Cancer), e conocido Myandra Croes (40) a bay sosega awe diahuebs. E lucha personal cu e la cuminsa tres aña pasa a bira uno lucha publico cu e meta pa concientisa e comunidad riba e malesa aki.  

KEN TA MYANDRA

Myandra Croes a crece na Hulanda, pero despues cu su 18 aña a bolbe Aruba. E la a traha 17 aña den e sector hotelero, cuminsando na Marriott y despues a traha cu un compania di afor. Recientemente debi na su situacion, no por a traha mas y a dedica su mes na Metastatic Breast Cancer, undabez cu e mes a keda diagnostica cu e malesa. E la lucha publicamente, creando concientisacion total, unda cu te na su morto, MBC, esta e malesa a bira casi sinonimo cu Myandra. Na ultimo hasta gobierno a haci un dedicatorio riba e dia internacional di cancer di pecho, dia 13 di October 2023. Awe mainta e noticia lamentable a drenta cu Myandra a bay sosega. E ta laga atras su dos yiu homber. Cu Myandra sosega na paz.