Aruba lo conoce su prome “Zomer Carnaval”

ORANJESTAD – Si tur cos sigui segun plan, otro aña Aruba lo conoce un ‘Zomer Carnaval” durante e prome dos simanan di juli di 2016. E fundacion organizador, ta yama nan mes “Aruba Summer Carnival” y a keda funda 1 di februari ultimo, pa un grupo di ‘individual nan dinamico cu un conocemento amplio di cultura caribense’. E tin cu bira un celebracion unda cu diferente cultura ta bin hunto den uno. “E Aruba Summer Carnival” ta enfoca pa duna e bishitante y localnan un experiencia unico cu un cantidad di parada, concierto, evento playero y cuminda internacional”.

FECHA DI EVENTO

E evento ta planea pa tuma lugar durante 18 dia, cuminsando dia 1 te dia 18 di juli 2016, y lo tuma lugar na e Carnival Village na San Nicolas. “Lo tin un cantidad di show live, di artistanan local e internacional. E paradanan lo tuma lugar den ciudad di San Nicolas.

DIFERENTE

Loke ta haci e grupo aki diferente di otro eventonan carnavalesco, ta cu nan kier ‘duna bek na e carnaval y participantenan’. E fundacion ta bisa cu ‘tur premio lo ta cash y lo busca manera pa haci e gruponan carnavalesco mas exitoso”. E grupo su ‘identidad’ no ta conoci ainda y nan kier mantene asina por lo pronto, pero a sigura cu pronto nan lo divulga nan mes pronto.