Schwengle: Den dos aña tin solucion definitivo pa ambulance

ORANJESTAD - Den un pa dos aña, cu dialogo transparente y cla mester yega na un solucion definitivo y cu ta financieramente mas factibel. Asina e minister di salud Alex Schwengle a bisa durante apertura di e post ‘nobo’ di ambulance na Wayaca. Manera NoticiaCla.com a raporta prome, diahuebs atardi IMSAN y Servicio di Ambulans, hunto cu e minister a celebra e apertura di un facilidad nobo como punto central pa ambulans na Aruba. E centro nobo, no mucho leu di unda e servicio tabata ubica anteriormente ta keda na Wayaca tambe, esta na Wayaca Falls, y ta ofrece aceso facil pa e caminda principal. Rudolf Rafini, kende ta e ex-hefe di operacion di Ambulans, a wordo pidi como huesped special pa efectua apertura di e oficina nobo.

ESTADO DEPLORABEL

Schwengle a splica cu, manera ya ta conoci, e oficina di ambulans anterior tabata den un condicion deplorabel y insigur. E trahadonan no por a keda uza e edificio mas y despues di a stipula e rekisitonan y un presupuesto pa huur, a cuminsa busca un localidad nobo pa e post. Tabatin diferente opcion, entre otro pa muda pa IMSAN, pero di punto di bista geografico esaki no tabata un bon solucion pa por provee henter Aruba cu servicio sigur, rapido y eficiente. Wayaca a keda e luga ideal y a logra haya e edificio unda awo nan ta ubica.Tambe e mandatario a indica cu lastimamente mester a subi e gastonan di operacion pa via di e huur, pero no tabatin otro opcion miho y esaki ta un solucion temporario.

TEAM DI AMBULANCE

E team di ambulans sa hopi bon kico nan mester, nan a haci un bon escogencia, sin abusa di confiansa, cu nada di luho, pero sigur funcional y den e limitenan di e presupuesto, Minister Schwengle a expresa. E colaboracion entre IMSAN, Ambulans y gobierno tabata fantastico, el a subraya cu confiansa cu hunto lo yega na un situacion win-win tambe pa e post central di Ambulans.

EKIPO NOBO

Bao maneho di IMSAN a dedica hopi tempo na educacion y ekipo, Minister Schwengle a remarca, aunke loke si ta keda cana un poco atras ta pa cu e palabracionnan pa loke ta trata e vehiculonan nobo. El a bisa cu e ta sperando miho añanan for di awo padilanti pa loke ta trata e presupuesto y asina por cumpli cu Ambulans cu e compra di un of dos vehiculo nobo. El a bisa cu berdad e ambulansnan ta bieu y a pidi e personal pa carga un poco pasenshi pa cosnan rond di e presupuesto di Pais Aruba keda regla. E solucion ta bin, el a agrega. E titular di salud a finalisa bisando cu e dialogo cu e ta hiba cu IMSAN, cu Ambulans y tur  partnernan den cuido ta mas habri y transparente posibel pa e ta riba un liña cu nan y nan cune pa garantisa mas desaroyonan positivo y esfuersonan exitoso den salubridad.