Aruba a sinti temblor leve den marduga

ORANJESTAD – E temblornan a wordo sinti na e.o. na Aruba marduga, , ta di un nivel ‘leve’ segun meteorologo Marc Oduber a splica NoticiaCla.com awe mainta. Aruba a sinti 2 temblor, e prome 2.8 y e di dos 3.7, di cual e ultimo mayoria hende na Aruba a raporta su efecto. “E ta manera un truck grandi ta pasa y ta zona y pone cierto cosnan tembla” Oduber a splica.

DOS TEMBLOR

E prome temblor tabata pa 12:14am, y tabata riba Paraguana (Punto Fijo) y tabatin un magnitud di 2.8 riba scala di richter, e forma cu ta midi temblor. Pero tabata e di dos cu tabata pa 2:03am, cu a hala atencion di hopi hende na Aruba. Segun Oduber, e efectonan por a wordo sinti riba henter e isla practicamente. Su magnitud tabata uno di 3.7 riba scala di richter cu ta wordo considera como uno ‘leve’. “Tin 100 mil di e tiponan aki rond di mundo henter aña. Pero ora cu e sosode banda di nos, e ta bira interesante” Oduber a sigui bisa.