Reaccion riba quickscan : Duelo entre Aruba y Hulanda ta continua

ORANJESTAD – Un dia despues cu e College Financieel Toezicht a emiti nan quick scan riba e presupuesto 2014, e duelo entre Aruba y Hulanda ta continua. Por lo menos segun e declaracionnan cu a keda haci tanto na Hulanda como Aruba, den e ultimo 24 ora. For di Hulanda, gobierno hulandes a uza e resultado como muestra di con malo e situacion na Aruba ta. Na Aruba, gobierno di Aruba a opta pa uza puntonan positivo pa ilustra nan acuerdo cu e rapport, y esnan negativo pa mustra nan desacuerdo. E partidonan politico cada uno a sigui nan trayecto partidario.

HULANDA

For di Hulanda, minister Plasterk a subraya su pensamento riba e rapport, indicando cu “Aruba tin problema serio cu presupuesto”. Plasterk ta sigui mustra cu ‘presupuesto no ta completo y tin cierto partinan cu no ta cuadra y e maneho financiero mes, no ta na ordo’. Prensa hulandes mientrastanto ta raporta cu “Aruba su finanzas ta manera un pos sin bom’, mientras cu por lo menos 7 corant hulandes a cita declaracion di Juan David Yrausquin, unda cu e e ta ‘pidi retiro’ di minister Ronald Plasterk. Yrausquin a declara dialuna atardi cu e rapport di CFT dificilmente por a papia ‘bon di Aruba sino esey lo nifica cu Plasterk mester a baha”.

ARUBA

Na Aruba den un declaracion breve den NoticiaCla dialuna, e prome partido pa reacciona tabata MEP, cu a indica via su lider cu ‘ta spera cu pueblo tin compasion awor cu e partido heel pasobra awor por compronde pakico no a vota na fabor di presupuesto 2014’. Diamars mainta, partido Democracia Real ta considera cu e rapport ‘a sali malisimo pa gobierno pa mi no uza e palabra devastador’, segun e lider Andin Bikker na prensa. Segun Bikker, e ta confirma cu e presupuesto no ta sirbi (Bikker tambe no a vota pro e presupuesto algun siman atras), y ta cita puntonan di e rapport manera cu ‘e no ta completo y e ta outdated’, ‘irealistico y e maneho financiero no ta na ordo’.

Partido AVP su lider di fraccion Rene Herde diamars mainta, a yama e dia cu e rapport preliminar a sali como ‘un dia sumamente interesante’. Herde su reaccion breve diamars mainta, basa riba e 8 paginanan : “ Bo ta yega na e conclusion cu si a forma e comision original hunto (experto Aruba y Hulanda), lo a haya mesun rapport, pero probablemente miho raport cu nos a haya ayera”. Esey ta e prome reaccion di Herde. Ademas e ta mustra cu ‘por a evita tur e problemanan cu a surgi siman pasa’. Eynan Herde ta referi na e ‘violacion di statuut, constitucion, desconfiansa enorme, pleitamento, discordia cu e problemanan siman pasa a crea’.

INTERPRETACION Hecho ta cu tur partido, oposicion y gobierno a haci nan maximo esfuerso pa interpreta e rapport su resultado den un forma cu ta funciona pa nan. AVP, MEP y Democracia Real, tur a usa cifra, rapport, citadonan y experto pa mustra cu nan punto di bista ta esun cu ta miho. NOTA. Foto CFT ta cortesia Noticia360 durante reunion na Corsou riba un fecha no menciona.