Andre Solagnier ta haya entierro policial diabierna

ORANJESTAD -   Andre Solagnier ta haya entierro policial diabierna. Diamars mainta personal y staf di Cuerpo di Polis a reuni dilanti di Centro di Husticia na Macuarima pa rindi honor na nan colega Andre Solagnier kende a fayece a consecuencia di un accidente cu su brommer dialuna marduga. “Cuerpo Policial ta na luto pa perdida di un gran colega cu hopi experiencia, un bon amigo, un tata, un yiu”, asina Alto Comisario mr. Adolfo “Dolfi” Richardson a expresa. COLEGAAndre Solagnier y Alto Comisario Richardson tabata colega for di nan entrada den Cuerpo Policial, nan a bay hunto Scol pa Polis y despues a sigui cu un carera den e organisacion. Andre Solagnier tabata traha e ultimo añanan den Centrale Post. E Alto Comisario a extende palabranan di condolencia na famia di Andre Solagnier y a pidi pa nos Todopoderoso duna nan tur e forsa y sosten pa yuda nan den e dianan nos dilanti. PERDIDAE perdida di Andre Solagnier a wordo sinti den henter comunidad di Aruba y hopi ta esunnan cu ta acerca Cuerpo Policial tambe cu palabranan di forsa y sosten, segun Richardson. El a bisa cu esaki ta un momento di reflexion pa cu e relacion entre sernan humano. “Laga nos biba bon cu otro, pasobra bo nunca sa ki ora ta bo ultimo dia,” Richardson a urgi. EXPERIENCIA DOLOROSOEl a bisa cu un experiencia asina doloroso ta pone realisa y refleha cu como Polis bo no ta un Superman y morto lo bati na porta di nos tur; ta bon pa realisa pues cu ta importante pa biba bon cu otro. Cu esaki, Dolfi Richardson a gradici tur miembro di Cuerpo di Polis pa e trabao cu nan ta haci diariamente pa haci di comunidad di Aruba un luga sigur. Finalisando, el a bisa cu e ultimo despedida di Andre Solognier lo tuma luga diabierna awor y cu e colega stima lo ricibi di su coleganan un “Korpsbegrafenis” cu tur honor.