Gran parti di placa ‘gehacked’ ta bek na Arubus

ORANJESTAD – Gran parti di e placa di e ‘episodio di hacking’ na Arubus ta bek riba cuenta di e compania di transporte local. Mirando e cantidad di rumornan cu ta sigui core riba e asunto, e director di e compania, Teo Croe,s a opta pa clarifica esey y mas riba e topico. Entre nan, cu ningun momento a bay Hong Kong pa ‘gara e hacker’ cu a ‘hack’ e placa, sino pa simplemente ‘recupera’ e placa ‘gehacked’. Y nan a logra recupera 4/5 di e placa. Mientrastanto e investigacion penal ta continua.

SUMA GEHACKED

E suma total cu a wordo ‘gehacked’ segun Croes, tabata AFL 568.000, =, di cual a logra deposita e suma di AFL 470.000, = bek riba e cuenta di e compania. Di e suma cu falta, -cu ta mas of menos 100 mil florin-, ta inclui e parti cu no a logra haya bek di e hacking, tin e gastonan pa a haci e biahe pa Hong Kong pa recupera e placa, y finalmente e suma cu mester a paga abogado(nan) pa por a logra recupera e placa. Cu e suma recupera sinembargo, ainda e compania no ta sali for di su situacion precario segun e director a bisa NoticiaCla.com. “Berdad, ainda nos ta den rood”, Croes a bisa, pero sigurando cu pa otro aña e ta spera di a remedia esey y cu e compania tin un situacion financiero sano atrobe.

INVESTIGACION PENAL

Loke falta ainda, ta e proceso di investigacion pa determina exactamente con e hacking a sosode, y mas importante, con por a hack e suma for di e cuenta di banco di e compania di transporte local. E director a desmenti mesora tambe na NoticiaCla.com cu ningun momento a mire como un posibel sospechoso di e caso, ni tampoco otro empleadonan colega di e compania. Tampoco ta conoci ken e hacker ta, ni con e placa a wordo gehacked. E unico cu nan sa sigur, ta cu a logra identifica e cuenta riba cual a pone e placa, te cu a logra ‘vries’ esaki pa por a recupera e suma.

CON A HAYA PLACA BEK

A splica tambe un biaha mas con henter e proceso a bay, for di momento cu a tuma nota di e placa cu a ‘somenta’. A resulta cu ta pa puro casualidad a logra detecta e asunto, ora cu e director a controla e cuenta riba un diasabra mainta. Ora cu a detecta e fayo, a tuma contacto cu e banco en cuestion mesora, informa polis, y tambe esnan na Hong Kong, y haci aangifte tanto na Aruba como Hong Kong. Esaki tabata necesario pa por a para e placa di sali for di e cuenta y plama y ‘desaparece’. Segun Croes, tur esaki a tuma mas tempo cu a spera y cu a indica inicialmente. Esey a pone cu cada bes tabatin un version diferente y tabata tarda mas, pasobra tabata depende totalmente di tercer partido pa informa. Pero na fin di cuenta, e ‘operacion’ pa recobra e placa tabata uno considera como exitoso, y a recupera gran parti di e placa. Awor tin un proceso diferente pa anda cu transferencia di placa na Arubus, pa evita cu esaki por continua den futuro.