Exs director di Giro Bank Eric Garcia por a bai cas cu banchi

WILLEMSTAD.- Eks  direktor di Giro bank  Eric Garcia (81) ku a keda kondená na 4 aña den korte di apelashon aña pasa 11 di febrüari 2021 por a bai kas ku banchi pa 6 luna largu. Hof a konfirmá e sentensia di korte di promé instansia, despues ku abogado general  a hasi demanda di 5 aña pa Garcia i a pidi pe paga bèk NAf 19.192.417,-.  Si e no kumpli e tin ku bai 3 aña será. Garcia a keda kondená pa malversashon komo curator, falsifikashon di  dokumentonan di banko Maduro na nòmber di Banco Maracaibo N.V. i tambe labamentu di plaka. Tur esakinan den e periodo di 1 di yanüari 2010 te ku 20 di yüli 2016 na Kòrsou i tambe Estádos Unídos.

Segun e veredikto, Garcia ku tabata curator i mester a manehá e plaka di bankarota di Banko Maracaibo, a transferí e plaka pa diferente kuenta bankario den eksterior. E plaka aki a bin resultá serka un kompania di invershon na Merka,  di kual esaki a ser usá pa kumpra akshonnan den Giro ku ta e mesun banko ku e akusado tabata manehá komo direktor. Esaki a sosodé sin konosementu i sin outorisashon di wes komisario den kaso di bankarota di Banko Maracaibo.  Segun e veredikto di e manera aki Garcia a purba atendé su propio aktonan froudulento sabiendo ku e tabata hasi algu robes.  Nan no ta kere e ponensia  ku Garcia a fia e dos invershonistanan plaka komo un fiansa pa nan paga bèk. Garcia a hasi dañonan finansiero enorme i a trese deskonfiansa komo curator den nos komunidat.

 E reputashon di e mundu bankario tambe a wòrdu afektá gravemente dor di su aktuashon i p’esei Hof a konta esaki komo  algu pisá kontra dje. Mirando tur esakinan Hof a yega na e kondena di 4 aña kitando aresto preventivo. Tambe Garcia tin ku paga Naf 19 185.00,- bèk sino e tin ku bai 3 aña será. Garcia a sinta terser parti di su kondena i awor por a bai kas bou di supervishon di banchi pa 6 luna largu.NOTA: E texto ta scirbi den Papiamento fonetico di Corsou.