Parlamento a cuminsa trata presupuesto 2023 sin presencia di oposicion

ORANJESTAD – Parlamento di Aruba a inicia cu tratamento di presupuesto 2023 dialuna mainta, pero sin presencia di opisicion. Aki ta trata di oposicion completo, esta AVP, ACCION21 y partido MAS. Segun oposicion, no por trata e presupuesto pasobra no tin conseho di CAFt ni Raad van Advies riba e cambio di BTW pa BBO. Esaki segun e fraccionan di oposicion, ta haci e tratamento illegal. Lider di fraccion di AVP Mike Eman a splica cu ora cu gobierno a haci e cambio pa no introduci BTW mas pa 2023 y cambia esaki pa aumento di BBO, no a manda e concepto bek pa e dos organonan consultativo aki, cu ta un violacion di ley. Como tal nan a opta pa bandona Parlamento. 

GOBIERNO

Gobierno den un carta pa presidente di Parlamento, a splica cu segun nan, ley no ta obliga gobierno tuma e rumbo cu oposicion ta pretende cu mester tuma. A cita parti di e ley di LAFt cu ta regula CAFt, unda cu ta para cu minister ta solicita di CAFt pa duna su conseho riba e ley di presupuesto, y cu den 14 dia CAFt mester duna e conseho. Sinembargo, segun gobierno, ta prerogativo si e minister ta haci e peticion ey. Ademas, CAFt tin cu wak e presupuesto despues cu e keda aproba y eynan e tin cu duna su conseho, igual cu Raad van Advies. Segun gobierno, de hecho cu RvA, nan no por husga cua metodo gobierno ta usa manera si ta BTW of BBO pa logra e entrada. Nan tin un otro meta specifico y segun gobierno, nan ta cumpliendo cu esey. 

RAAD VAN ADVIES

Segun gobierno un presupuesto ta un apoderacion (machtiging) di Parlamento na gobierno riba gastonan. Riba esey mester tin conseho di RvA. Pa loke ta entrada ta un calculacion cu gobierno ta duna. Esey no ta cay dentro di e apoderacion (machtiging). Pesey con gobierno ta duna contenido na su entradanan, no mester necesariamente bay Raad van Advies. Ademas, riba e BTW of BBO mes, Raad van Advies lo duna su conseho separa. 

CAFT

Pa loke ta CAFt, gobiern ta sigura cu Caft pa ley mester duna conseho despues cu Staten trate. “Un conseho prome ta opcional no obligatorio. E conseho a wordo pidi y a wordo duna” gobierno a bisa. Gobiern ta sigui bisa cu e argumento aki ya oposicion a expresa por escrito dia 5 september ultimo y Minister President y Minister di Finansas a contesta e carta extensamente inmediatamente desde 12 di september. Nunca mas oposicion a reacciona. 

REALIDAD

Noticiacla por bisa cu CAFT a ricibi e concepto di e presupuesto inicial (den cual tin BTW poni y no BBO ainda) dia 9 di juni 2022 y 23 di juni di 2023 e la manda su conseho pa gobierno di Aruba. Pues gobierno a hacie loke e la bisa cu e no mester haci, y a opta pa hacie e biaha ey si. E portal aki a compronde cu lo tabata corecto pa bolbe manda e presupuesto bek pa CAFt pa un conseho e biaha aki cu e cambio di BBO. Pero gobierno a opta pa no haci esaki e biaha aki.