Parkeermeters den Oranjestad operacional na mei

ORANJESTAD – Pa prome siman di mei, e prome tanda di e serie total di 105 parkeermeters lo mester ta instala den Oranjestad y operacional. Esaki e director di Arubus, Teo Croes a confirma na NoticiaCla.com awe. E prome set di e meternan ta yega Aruba dia 25 di april y despues di un siman y mey nan lo ta instala y cla pa uso. Esey ta, si e ley cu ta legitima e operacion keda trata den parlamento prome. “Nos ta premira cu pa e tempo ey e ley a pasa” Croes a sigura NoticiaCla.com.

RETRASO

E proyecto total ta coriendo un retraso di por lo menos 5 luna, si mira cu inicialmente esaki mester a keda cla na inicio di december di aña pasa. Pero e hecho cu e ley ainda no a keda aproba den parlamento, y e material mes no a yega Aruba, esaki a conoce e retraso conoci. Mirando e situacion, a dicidi pa cuminsa cu e preparacionnan operacional, pendiente e aprobacion di e ley. Esaki ta pone cu no mester core traha e parti operacional te ora cu e ley a pasa. Pa loke ta e ley mes, Croes a sigura cu falta e ‘nader rapport’ ainda.

AREA

En total, lo tin cantidad di 105 parkeermeter cu tin cu keda instala na tanto Oranjestad como e area di Palmbeach. Lo cuminsa cu Oranjestad y sigui despues pa e area di hotel. A prepara tur e areanan caba, door di e.o. pinta e areanan cu lo wordo usa como parkeer area y unda cu tin cu pone e meternan.

SOLAR

E meternan mes lo ta facil pa instala y ta traha riba ‘energia solar’ y lo wordo uza den forma varia, esta di un espacio, pa algun espacio conhunto. E intencion ta pa tene un campaña di concientisacion aki poco tempo, pa informa e comunidad di e uso di e aparatonan, y kico tur e proyecto ta ensera.