Koolman: Sorprendi cu blackout! No a anticipa problema cu sistema di control

ORANJESTAD – E blackout di diasabra anochi na WEB, a gara e compania mes di sorpresa, pasobra no a spera cu esey lo a sosode. Asina por a compronde di e director di e compania Alfredo Koolman den su contesta na Noticiacla dialuna mainta durante un conferencia di prensa. Prome cu e otro blackoutnan cu a tuma lugar mas prome den aña, WEB a medio alerta e comunidad cu tabatin posibilidad cu por tabatin cierto interupcion, y consecuentemente a alerta pa e chens ey. Den e caso di e weekend aki, no a anuncia nada, pasobra no a kere cu esaki lo a pasa, esta e blackout. Mientras cu e motibo exacto no ta conoci ainda, di loke sa, y ta papia awor di ‘sospecho, ta cu e problema ta den e sistema di control’ a y lo tuma medida pa e loke a sosode, no ta tuma lugar mas. 

MAS CAUTELOSO

Loke segun Koolman, ta haci awor ta cu lo ta mucho mas cauteloso. Esey kier men cu den futuro, si tin cu bay haci algo asina cu por tin como consecuencia, un otro blackout, lo tuma precaucion cu e.o. e gas turbine of otro tipo di medida pa evita descontinuidad di e servicio di coriente. 

INVESTIGA PERO RAPORT TA KEDA “SCONDI”

E portal aki a confronta sr Koolman cu e hecho cu mientras cu berdad ta transparente cu duna informacion, e informacion cu ta wordo duna, no ta esun necesariamente cu e pueblo kier of mester. P.e. ta djis opta pa ripiti tur e transaccionan cu a tuma lugar (cual a keda anuncia caba durante e acto), y ki ora cua y cua bario a haya coriente bek. E informacion ey ta bira informacion ‘bieu’ y un simple ripiticion. Aki e director a admiti cu esaki enberdad (e comunicacion) por bay miho. E la sigura cu e ta usa e informacion kico tin disponible, y ta haci esaki na tur stakeholder.