Na Corsou, un turista di barco crusero a hoga

WILLEMSTAD. – Un turista di barku krusero a fayesé despues ku e tabata sambuyá. Djasabra alrededor di algun minüt pa kuat’or di atardi, Sentral di Polis a risibí notifikashon ku na Playa di Marie Pampun tin un kaso di hogamentu. Sentral a dirigí un unidat di Punda ku urgensia pa e sitio. Na yegada di e unidat, a tuma nota ku algun persona den besindario a saka e víktima, (un hende hòmber) for di awa i huntu ku personal di ambulans ku tabata na e sitio a trata di reanim’é, pero sin e resultado deseá.

For di investigashon preliminar a resultá ku e hòmber aki tabata sambuyá na e playa i direpente a hañ’é ku komplikashon, ku e konsekuensia ku el a guli basta awa. Dòkter di polis a konstatá morto di e hòmber aki.

Polis a konfiská e ekipo di sambuyá pa mas investigashon. Riba òrdu di fiskal a konfiská e kurpa pa hasi outopsia di lei. Polis ta reservá e identifikashon di e víktima te na momento ku famia wòrdu informá debidamente di loke a tuma lugá.

EXTRA a komprondé ku tabatin basta persona na e sitio indikando ku mester a avisá e turistanan ku laman ta brutu promé ku a hür nan ekipo di sambuyá. Na momentu ku e insidente a surgi, laman tabata hopi brutu no den e área ei so, sino vários otro parti. NOTA: E texto ta scirbi den papiamento fonetico di Corsou.