Ruben Garcia a haya un entiero musical cu asistencia masal di pueblo

ORANJESTAD – E conocido locutor cu a fayece diripiente e siman cu a pasa, Ruben Garcia, a haya un entiero musical diadomingo, como un homenahe pa su bida cu e el hiba y tambe como un gradicimento di e mundo musical y farandula, pa tur loke e la haci pa e ramo aki. Un tras di otro, riba un tarima pafo di e lugar mortuario Royal Funeral Home, artista y bandanan tabata presenta, completo cu declamacion y discurso, mientras cu paden, por a despidi di Ruben. Pa casi 4 ora largo tabatin un fila largo di persona cu a bin despidi di Ruben. E ambiente tabata uno di musica, y e comentario tabata unanime: Asinaki Ruben lo tabata kier!. Esey no a kita afo cu tabatin tristeza den sala, pasobra ainda mayoria no tabata por a compronde, acepta y kere e forma repentino cu Ruben a bay laga e mundo aki. Esey a haci e situacion un poco mas doloroso. Asina mes, pa varios ora diadomingo, Aruba a mustra cu nan a stima Ruben y cu Ruben a haya su despedida manera cu e merece. NOTA: E potret ta di momentonan di preparacion diadomingo, prome cu e entiero a cuminsa.