Blackout di diasabra tabatin su origen na WEB causa pa switching di sistema

ORANJESTAD – E blackout di diasabra anochi na Aruba causa pa fayo den sistema na WEB, tabata relata na e cambio di sistema di control di boiler pa Recip, aunke WEB mes a bisa cu ainda e causa exacto ta wordo investiga. Asina un voice note for di WEB a informa diasabra anochi. Un cuarto pasa di 8 diasabra, Aruba a drenta den un blackout, cu a dura mas of menos 2 ora y mei, aunke tabatin otro areanan unda cu coriente a bay atrobe mas laat y bin bek te marduga. Mientrastanto dialuna mainta awor durante un conferencia di prensa, director di WEB lo duna splicacion riba e loke a sosode diasabra anochi. 

SISTEMA DI CONTROL

Segun e splicacion di WEB diasabra anochi, tabata un cambio di sistema di control cu a cuminsa diabierna y termina diasabra, unda cu WEB a tuma e unidadnan riba control local, aunke no ta splica kico esey ta nifica. Segun WEB, a resolve e problema diasabra anochi, net prome cu e blackout, y ta relata na un accion di switch di local control pa control system en general, causando e blackout. 

RECUPERA

For di 10’or a cuminsa recupera e coriente y pa 11’or, mayoria cas tabatin coriente atrobe na Aruba. 

WEB y ELMAR

Tanto WEB como ELMAR a manda nan respectivo mensahe riba e tema, sino duna mucho informacion riba e origen, pero a mas bien raporta e ‘recuperacion’ di barionan y a pidi atrobe, e disculpa di custumber.