AZV: Dokternan di cas a sigui curso “Promedico”

ORANJESTAD - Recientemente ITP Caribbean hunto cu HAVA (Asociacion di Dokternan di Cas di Aruba) y AZV a facilita un curso tocante e forma di documenta dato di pashent den e programa electronico “Promedico”. E curso aki tabata tin su enfoke riba e miho formanan cu tin pa registra, haci anotacion y warda informacion di pashent den e programa “Promedico”.

INICIO

Pa algun an?a caba, e dokternan di cas tin y ta traha cu e programa automatisa yama “Promedico”. Sinembargo, no ta tur dokter di cas (incluyendo e assistentnan di dokter) tabata haya e trahamento cu e programa aki uno facil. Tabata tin diferencia grandi den con ta registra y mantene e filenan medico di pashent den e programa aki.

META DI E CURSO

E intencion di AZV semper tabata pa yega na mehoracion di e filenan medico. Un forma pa haci esaki ta door di stimula e (bon) uzo di “Promedico”. Tambe mester yega riba un lin?a; esta palabra kico exactamente ta wordo registra, den cua parti of partinan di e programa y di ki forma.

DUNADO DI CURSO

E curso a wordo duna door di dokter Jan Levelink. Dokter Jan Levelink ta un dokter di cas Hulandes cu ta cu pensioen. Su persona a ricibi e “Ridder van Oranje Nassau” na Hulanda pa su aporte grandi cu e tabata tin den e mehoracion di calidad di cuido medico. Tambe dokter Jan Levelink tabata (hopi cerca) envolvi den e desaroyo di e programa “Promedico”.

CONTENIDO DI E CURSO

E curso a wordo ofreci na tur dokter di cas, tur asistente di dokter di cas, tur praktijkondersteuner y tur dokter di cas den training. E gastonan di e curso tabata 440 florin pa cada participante. E curso a wordo teni den luna di maart y ta acredita pa e dokternan di cas cu registracion BIG.

Durante di e curso a enfoka riba e lin?anan di guia y e metodonan di registracion stipula door di “Nederlands Huisarts Genootschap”. Tambe a ofrece e cursistanan topiconan manera e sistema SOEP (“Subjectief Objectief Evaluatie Plan”), e codigo ICPC (“International Classification of Primary Care”) y e registracion segun cada episodio.

Un total di 114 participante a sigui e curso, for di cual 34 tabata dokter di cas.

FUTURO

AZV a haya bon comentario di e cursistanan tocante e curso. Mayoria a laga sa cu nan a haya bon tips. Tambe cu awor nan ta mas entusiasma pa sigui traha cu e sistema. AZV di su parti ta spera cu cada cursista a haya suficiente conocimento y habilidad pa mantene e filenan medico optimalmente den e programa. Pa futuro di Aruba, unda mas y mas kier traha cu filenan medico electronico, esaki sigur ta un bon desaroyo y progreso. AZV ta gradici ITP Caribbean, HAVA, dokter Jan Levelink y tur cursista pa nan atencion y interes.