Sinterklaas y su pietnan di color ta yega Aruba dia 13 di november proximo

ORANJESTAD – Despues di un periodo di 2 aña pa motibo di pandemia, Aruba ta ricibi Sinterklaas atrobe e aña aki. E aña aki e homber santo ta yega Aruba dia 13 di November mainta 10’or cu su 75 piet di color. E biaha aki tin algun cambio, manera e lugar di yegada (Harbour Arena, debi cu na waf regular tin barco crucero aden), e ruta e ta mas chikito y ta termina na Plaza Padu), y cu lo tin un parada cu grupo di mucha y brassband. Na Plaza Padu, lo tin un celebracion cu lo dura for di mas of menos 1’or te 2’or di atardi. Ta premira cu e homber santo yega e plaza den careda di 12’or di merdia. E portanan di Harbour Arena ta habri for di 9’or di mainta. E mandatario responsabel pa cultura, Xiomara Maduro a elabora tambe riba e aspecto di pietnan cu ta na color, compara cu e pietnan cu antes tabata preto. Un problema di discriminacion cu a cuminsa na Hulanda, a plama pa resto di Reino y a splica cu kier a evita problema y polemica pa cual a dicidi di trece pietnan di color. Antes e evento aki tabata organisa pa fundacion Sinterklaas cu a keda funda oficialmente na 2012. Pero realmente voluntarionan formando parti di e grupo 'no oficial'  tabata organisa e yegada pa 29 aña y e aña aki lo a cumpli 30 aña. Por corda nombernan di persona cu tabata envolvi manera juffrouw Wekker. Sra Evelyn Frank a lidera e fundacion Sinterklaas pa mas di 10 aña. Lamentablemente gobierno a dicidi otro e aña aki cu e grupo (awor cu fundacion) no a logra haci esaki pa di 30 biaha.  E mandatario a splica noticiacla cu un di e motibonan pa a cambia di organisacion, ta pasobra tabata kier inovacion pa cu e evento, pero no a bisa specificamente e momento ey kico e cambionan lo tabata. E unico cambio cu por a compronde cu tin, ta e.o. e ruta mas cortico y e lugar di tene e evento, compaña pa mas grupo.