Sevinger: Lo no a aproba tereno si tabata sa cu lo bende despues pa miyones

ORANJESTAD – Mientras cu diahuebs tanto ex minister Benny Sevinger com ex director di Directie Infrastructuur & Planning (DIP), F. Abath respectivamente a admiti na hues cu nan a firma y aproba tereno erfpacht na cierto persona den un forma ‘lihe’, ambos a declara tambe cu si nan tabata sa delanta cu e terenonan aki lo a wordo usa pa benta pa sumanan astronomico, nan lo no a duna nan aprobacion. Ta keda e pregunta cu si e accion aki tambe ta considera como algo legal of no. Esey ta despues pa hues determina. Mester bisa mesora tambe cu e hues na inicio di e caso ayera, a purba aclaria un posibel ‘percepcion’ robez cu a wordo crea di dje na comienso di e caso na September. E la splica tur hende den sala (specificamente dirigi na e sospechoso y abogadonan) cu e por zona hopi critico den su forma di haci preguntanan, pero cu esey, (contrario na loke abogadonan tabata critica di dje), no por conclui cu esey ta implica cu su decision ta tuma caba. “Mi ta critico pasobra mi kier saca un reaccion di boso,” el a sigura tanto e sospechosonan como e abogadonan.    

BENNY Y ABATH

Tabata durante e intercambio diahuebs entre e hues de Doelder y e ex minister cu e tema aki a bin ariba atrobe. Hues a haya remarkable cu e transaccionan aki ta tuma lugar unda cu hende ta gana placa bruto asina facil. “Bale la pena” e hues a bisa dado momento. Aki e la cuestiona e ex minister si e tabata na altura di e sumanan pa cual e terenonan aki tabata wordo bendi adelanta. Y cu si e tabata sa esey, si e lo a firma y aproba mes facil tambe. Aki ta prome biaha cu Sevinger a admiti cu si e tabata sa cu ta negoshi nan tabata haci asina, door di bende tereno di casi nada di balor y gana miyones, e lo a nenga pa firma. Abath mientrastanto a wordo confronta cu e mesun pregunta, unda cu hues a cambia e pregunta si un poco. E la puntra Abath cu si e tabata sa e destinacion final di e terenonan, si e lo a conseha e minister positivo tambe, Abath a contesta :” “Si mi tabata sa (esey), lo mi a pensa otro”.

NO A ACTUA ILEGAL

Aki Sevinger a probecha pa trece su keho dilanti y a dirigi su mes na e fiscalnan di ministerio publico, usando un carta di e propio OM cu e la ricibi recientemente. E carta ey ta esun cu ta informa e ex mandatario cu a dicidi pa ‘seponeer’ e acusacion cu e la entrega contra actual prome minister di Aruba Evelyn Wever, pa loke e ex mandatario ta alega cu ta algo ‘similar’ di loke e ta wordo acusa aworaki. Cu e carta, segun Sevinger, ministerio publico ta admiti cu e benta di tereno manera cu e la haci y cu actual prome minister tambe a haci (tereno di Waterpark), no ta illegal. Aki e fiscal a compronde e mensahe y tambe cua carta Sevinger tabata referi na dje y a splica cu esey ta pasobra segun un ‘omissie in de wet, kan dat”, sugeriendo cu tin un buraco den ley cu ta permiti e tipo di bentanan ey. Aki Sevinger a bisa cu e ora no por ta asina cu ta culpe di algo illegal, mientras cu fiscal mes ta admiti cu e mesun acto haci cu e actual minister, e ta legal.