Avestruz: Mas comerciante local sospecha di a enrikese nan mes cu benta di tereno erfpacht

ORANJESTAD – Corte a continua awe diahuebs mainta cu tratamento di e caso penal Avestruz cu e.o. ex minister Benny Sevinger como e sospechoso principal. Fuera di Sevinger, tabatin awe e sospechosonan F. Abath, E. Werleman, N. Nuñez, y C. Mansur. Hues de Doelder a ‘interoga’ e sospechonan riba nan envolvimento den ,-mescos cu e otro casonan anterior-, posibel compra y benta ilegal di tereno erfpacht cu e fin pa enrikese nan mes. Tur esaki cu ayudo di e ex mandatario responsabel e tempo ey pa e cartera di infrastructura. 

DAMIRA Y LISNER

Mescos cu e otro casonan, hues mesora a purba establece e.o. ‘legalidad’ di e creacion y maneho di companianan cu a wordo usa pa pidi tereno y despues a bende nan, incluyendo esunnan realmente responsabel pa e compania(nan). Mescos cu e caso anterior, loke a resalta di e interaccion entre hues y sospechosonan, tabata e duda cu e companianan realmente tabata crea pa cumpli cu meta ‘splica’ , esta busca tereno erfpacht pa desaroya proyectonan na bienestar di Aruba. Pero for di e interogacion tabata sali na cla (atrobe) cu e companianan aki lo a wordo lanta porta cu e intencion ey, pero cu na caminda e meta a ‘cambia’ y a simplemente bira un negoshi di bende tereno lucrativo erfpacht na cumpradornan poderoso stranhero pa sumanan miyonario, lagando esnan cu a pidi e tereno, un ganashi exorbitante. E caso di awe a trata e dossier envolviendo por lo menos dos compania cu a wordo lanta cu e fin pa traha apartamento y huur nan cu tercero, preferiblemente turista, mirando e localidad privilegia. E companianan en cuestion awe tabata entre otro Damira y Lisner, ambos cu nan propio doñonan e tempo di nan creacion durante e periodo di gobernacion cu Sevinger tabata minister. 

STROMAN

Mescos cu e caso anterior, e hues tabata cuestiona e credibilidad di primordialmente e director di e companianan pa sa si a djis ‘pone nan’ eynan pa ‘spek en bonen’, of si realmente nan tabatin conocemento di e tipo di negoshi pa cual e compania a wordo lanta. Mientras cu den caso di Mansur, hues tabata notablemente dudoso, ya cu Mansur su contestanan tabata contradictorio den bista di e hues, y (mescos cu biaha pasa), ora cu segun e hues, e sospechoso tabata haye den un ‘perta’, e ‘no tabata corda exactamente mas, kico ta kico. For di e interogacion, e sospechosonan Werleman y Nuñez di otro banda, a mustra hues cu nan intencion tabata pa continua cu nan practica di traha apartamento y huur esaki primordialmente cu turista y cu sigur Werleman tabatin e experiencia necesario pa cu e negoshi. Pa esey nan (e y su casa) a lanta e compania y haci peticion pa un tereno di 3 mil m2, riba cual tabatin e intencion di pone 15 apartamento. Werleman a sigura e hues, cu entre cumpra y traha y maneha 29 apartamento previo riba tres diferente proyect, e tin e experiencia necesario pa e proyecto ‘nobo’ aki. Algo cu a cambia na caminda. Hues a cuestiona si, di e forma con Werleman y su casa Nuñez a keda cla cu e minister pa haya e tereno (aunke Werleman ta bisa cu a dura finalmente 2 aña prome cu e tereno por a lanta fo’I tera) , unda cu a resulta cu aki tambe relacion di amistad lo a favorece Werleman y Nuñez grandemente, compara cu si nan no tabatin Sevinger como ‘amigo’ politico. Den e caso di Werleman y Nuñez, hues a cuestiona cu aki (tambe) e minister lo a duna acuerdo mesora pa cu e peticion di tereno erfpacht, cu tabata traduci den procesamento sigur di e tereno(nan) y unda cu atrobe tabatin e ‘misterioso’ stempel di SPOED (urgente) cu ningun hende tabata sa ken a pone, pero cu ‘un hende sigur na Directie Infrastructuur en Planning (DIP) lo mester a pone. Werleman y Nuñez a haci nan debido esfuerso pa convence e hues cu nan amistad (Werleman tabata consehero di Sevinger) y relacion politico (di e mesun partido berde) no tabata e motibo pa cual nan a wordo ‘previligia’. 

DI INVERSIONISTA PA CUMPRADO

Mescos cu e caso anterior, hues a recorda e sospechosonan cu aparentemente tin un problema pa compronde e ‘diferencia’ entre kico ta un cumprado y kico ta un inversionista. Esaki pasobra ora cu nan splica na comienso cu tabata busca inversionista pa desaroya nan proyecto(nan), ta ‘aparece’ un persona interesa pa diripiente ‘cumpra’ henter e proyecto pues e doñonan originalmente ta bira bendedor, y e ‘inversionista’ ta bira e ‘cumprado’. Den e caso aki tambe esaki a sosode. Aki hues a cuestiona Werleman pakico e mes no a desaroya e proyecto, y pakico a opta pa bende e compania y e terenonan. Werleman a purba splica e hues cu ta nan a wordo acerca via un otro compania di Real Estate di famia Henriquez, Spazio Realy Aruba  cu a trece un Venezolano interesa (Grupo Donato) hunto cu C. Mansur, cu tambe tabatin tereno cu e la pidi y haya opcion pe pa tambe desaroya apartamento. Dado momento e cumprado a haci oferta unda cu a paga no menos cu 3 miyon dollar pa tur cos, lagando Werleman, Nuñez y Mansur cu un ganashi ‘basta bon danki’. Hues a cuestiona e ganashi bunita di 1.5 miyon dollar cu Mansur a gana cu e ‘deal’ aki, y tambe Werleman pa e 3 miyon dollar a wordo gana. 

NIVEL MAS GRANDI

Werleman a splica tambe cu pa loke ta e duda den su experiencia como desaroyado, enberdad e tin experienca cu desaroyo y maneho di tereno, pero e loke cu e cumpradonan Venezolano kier a haci, ta di un nivel mucho mas grandi pa cual e no tin e experiencia ey si. Y contestando e pregunta di hues pakico no ta e venezolanonan mes tabata haci peticion pa cumpra tereno y cu ta nan (localnan) mester a haci esaki, a sali na clao cu legalmente esaki no tabata permiti pa departamento economico. Entre e ‘reglanan di wega’, pa un persona haci peticion pa opcion pa tereno, e mester ta un local y tin mayoria di accion den e respectivo compania. Un stranhero por tin solamente un rol minoritario, y como tal no por pidi tereno. Y como alternativa, ta cumpra e compania completo despues, unabez cu e persona local a haya e tereno di gobierno. E cumprado asina ta logra su meta toch. A keda un discusion den corte kico ta wordo comprendi cu ‘local’, y si e persona mester ta naci na Aruba, tin pasaporte hulandes etc. Na final, hues a atende e localnan Werleman, Nuñez y Mansur, cu e forma cu nan a opera, a percura pa nan tur haya un ganashi bunita, di un practica cu moralmente no ta corecto. E pregunta cu tin cu wordo trata den corte ainda, ta si e loke a sosode, mientras moralmente no corecto, ta illegal of no. Tin mas articulo riba e tema na caminda.