ABA: Banconan no por sostene e ‘bank financial transfer levy’

ORANJESTAD – Banconan di Aruba no por sostene introduccion di un asina yama ' bank financial transfer levy'. Presidente di Aruba Bankers Association (ABA)  Pierre Rafini a splica Noticiacla.com cu oficialmente banconan no a wordo informa di e status ni detayes di e tax aki, pues tampoco di su posibel implementacion. Loke si e por a sigura, ta cu si introduci e tax aki, e lo afecta tur tipo di transaccion di banco. E cantidad di e tax tabata stipula na 1 promile pa transaccion, ultimo biaha cu Rafini a tende di e asunto aki.  Tur cos considera, Rafini ta confirma cu e medida aki lo afecta e sector bancario seriamente. “Pero no ta conoci ainda si e ta sigui sigur”, E presidente di e asosacion di banconan a sigui bisa.

LIMITA TRANSACCION

Segun Rafini, Asociacion di Banconan di Aruba (ABA) ta di opinion cu door di introduci un tax asina, bo ta limita transaccionnan na banco. “Consecuentemente nan lo trece menos placa banco tambe y consecuentemente banco lo tin menos funding”. Y ora cu esey sosode segun Rafini, bo por duna menos fiansa cu ta trece un limitacion di un crecemento di bo economia.

FALTA DI SOSTEN

Como tal ABA, saliendo for di e punto di bista inicial di e informacion cu nan a haya di ‘con’ e lo wordo introduci y kico e ta bay ensera, Rafini ta confirma cu esaki ta algo cu no tin e sosten di Aruba Bankers Association.

IDEA DI GOBIERNO

Tabata aña pasa cu gobierno di Aruba a informacion nan intencion di introduci e tax aki, cu lo mester genera basta fondo pa caha di gobierno. E anuncio a conta cu basta resistencia den comunidad, y sigur serca e instancianan financiero manera e 4 banconan di Aruba, specialmente e asociacion di banco. Despues no a tende nada mas ora cu aña a bolter. Algun siman pasa riba pregunta di NoticiaCla.com na minister di finanza Angel Bermudez, e la referi na esaki cu e ta ‘den pipeline’ y cu ta un asunto awor di minister di economia. No por a bisa con lew e preparacion tabata, ni si e decision final a cay pa cu su ehecucion. E intencion tabata pa haci e investigacion necesario y despues keda cla pa introduci esaki pa juni/juli di e aña aki ainda. Algo cu pues ainda no ta confirma. Y for di e asociacion di banconan, por nota cu nan mes ainda no tin nada nobo y concreto riba e asunto aki.