MetaCorp a laga traha rolstoel special na Alemania pa Ethan Geerman cu tin enfermedad genetico straño

ORANJESTAD - Ethan Geerman tin shete aña di edad y a nace cu Epidermolysis bullosa (EB), un enfermedad genetico hopi straño. E t’e unico mucha cu tin e aki na Aruba y e enfermedad ta bin cu su dificultadnan. MetaCorp a haci un donacion na Ethan den forma di un rolstoel. Eddie de Veer, CEO di MetaCorp a bisa di ta consciente cu e enfermedad di Ethan ta unico na Aruba y cu tin di haber cu e genesnan y cuero. E mucha no tin suficiente proteccion.

PETICION DI STUDIANTE

Esey ta haci cu ora a haya peticion di un grupo di studiante di Universidad di Aruba, a bay busca un tiki mas leu di e enfemedad aki. El a pensa cu esaki ta un tiki special y inusual y a analisa pa dun’e un man. A tuma contacto cu e mama, Shahaira Geerman y hunto a busca tur informacion necesario di con pa traha un rolstoel na e necesidad y tamaño di Ethan cu su crecemento na mente. E studiantenan a haci un peticion pa un rolstoel special pa e mucha, cu tur e necesidadnan cu e enfermedad ta bin cu ne.

E PROCESO P’E ROLSTOEL

A presenta un compania na Alemania specialisa den esaki, pa logra traha e stoel y awo a bin entreg’e como un donacion n’e mama cu ta un nurse profesional, unda cu su bida a bira awo pa cuida su yiu 24 ora pa dia.

TOCANTE E ENFERMEDAD

Epidermolysis bullosa (EB) ta un enfermedad raro cu ta provoca herida y ta haci bo cuero hopi fragil.  E heridanan por aparece debi na lesionnan chikito, incluyendo door di calor of si bo grawat’e of rasc’e. Den casonan mas severo, por haya herida y cuero fragil hasta den bo curpa, por ehempel den bo boca of den stoma. E enfermedad ta bon debi na un “gene” defecto. Ta estima cu un den cada 50 mil mucha na mundo ta nace cu ne. Lamentablemente ainda mundo no a desaroya un cura (remedi) pa preveni ni pa cura e enfermedad aki. Ta cuestion di siña biba cu ne, cu tur consecuencia cu e ta trece cu ne.

DANKI NA TUR CU A YUDA

Eddie de Veer a gradici tur hende cu a yuda den e proceso aki. Su staf na oficina cu a sinta pa varios ora ta yama Alemania of pa manda e-mail. Obviamente na Shahaira Geerman mes cu tabatin e pasenshi pa por a tolera e yamadanan di MetaCorp, pasobra cada biaha tabata pidi nan detaye nobo. Y ta gradici Ethan tambe cu a acepta e donacion aki.

E RETO DI TUR DIA

Shahaira Geerman ta mama di Ethan y a conta cu den e condicion cu su yiu ta aden, tin hopi reto. Un di e retonan ta movemento. Tur hende ta wak e ta cana, ta hunga futbol, e ta haci hopi otro actividad. Pero e tin su retonan. No ta tur dia e por move mesun bon. Por ta hende ta mira e parti bon of ta mustra e parti bon. Pero tin dia e ta pasa riba cama pasobra su pianan ta dolor, ta loke hende no ta mira. Esey ta haci cu e ta minimalisa su movecionnan. Den fin di siman, Geerman a comenta, cu no ta verbanta su pianan. Esey ta haci cu no por move bay ningun caminda.

UN GESTO VALIOSO

Cu e rolstoel aki, ta brinda e famia posibilidad pa un miho calidad di bida. Lo por sigui disfruta di bay mira un pelicula den fin di siman como famia, sali bay come afo, na luga di keda un fin di siman na cas