Morto di Vale Croes y Andre Solagnier a sacudi Aruba

ORANJESTAD – E morto di tanto e agente policial Andre Solagnier, como e comico Vale Croes a sacudi e isla di Aruba grandemente dialuna. For di momento di e morto di ambos persona, pa medio di rednan social y otro medio, ciudadanonan a cuminsa inunda esaki cu mensahenan personal di convivencia. Loke a resalta rapidamente, ta e aprecio y amistad cu ambos persona tabata gosa di parti di nan amigo, colega y familiarnan. Aunke ambos tabatin nan diferente ‘carera’, tabata notable cu nan a haci un impacto den bida di nan sernan keri y esey a keda demostra grandemente durante di dialuna.

PAGINA PERSONAL

Hopi a opta pa den caso di Vale Croes p.e, pa pone nan potret personal cune riba nan pagina, mientras cu di parti di e polis Andre Solagnier, coleganan mas parti a cuminsa pone mensahe di luto riba nan respectivo pagina.

MANDATARIONAN

Rapidamente mandatarionan tambe a comparti nan momentonan cu ambos persona, manera minister di Cultura Otmar Oduber pa Vale Croes (Croes tabata hopi tempo un ambtenaar di gobierno trahando cu ATA) y minister di husticia Arthur Dowers (hefe maximo di e agente policial Solagnier). Hasta ex minister di husticia, Rudy Croes tambe a uni su mes cu un mensahe, mirando cu Solagnier tabata forma parti di nan grupo di motociclista Harley y e atardi ey ainda, a forma parti di un celebracion di pasco. Asina cada persona na nan forma, a sa di expresa nan mes di nan forma, sea cu foto y of mensahe solamente, pa mustra cu nan a keda sacudi cu e mensahe.

INTERNACIONAL

Den caso di e comediante Vale Croes, tabata notable cu no solamente local sino internacionalmente tambe e tabata haya homenahe na su nomber. Hopi keri p.e. na Corsou y Bonaire, hasta miembronan di prensa di Corsou y Bonaire a keda conmovi y raporta no solamente e noticia di morto, sino tambe nan mensahe personal. Telecuracao como ehempel, a inclui e noticia di su morto den nan boletin di anochi. Den tur circulo, Vale a toca hende nan curason, y esey tabata visible dialuna durante curso di dia. Un biaha mas, NoticiaCla.com ta manda palabra di forza pa famianan di tanto Vale Croes, como Andre Solagnier. Cu nan alma sosega na paz, y cu e famia por haya consuelo cu tur e atencion cu e dos defuntonan a y ta hayando pa medio di e mensahenan e dianan nos dilanti.