Detencion di chauffeur cu a causa accidente cu tres morto, prolonga cu 60 dia

ORANJESTAD – E detencion di e chauffeur masculino S. Wilson cu un luna pasa a causa accidente di trafico fatal cu 3 morto, a keda prolonga awe (diamars) cu 60 dia. Vocero di Ministerio Publico Ann Angela a confirma tambe pa NoticiaCla.com cu Wilson ta cera na KIA varios dia pasa caba y lo keda eynan por lo pronto. Tabata dia 12 di October 2022, 10 dia despues di a causa e accidente, e la keda deteni riba sospecho di ‘doodslag cq dood door schuld’ osea homicidio sin premeditacion, of homicidio culposo pa e morto di e tres personanan den e otro auto. Ta trata di dos ruman muher y un yiu homber di un di e damanan cu a fayece. Mientrastanto ta keda e asunto unda cu supuestamente un di e damanan  tabata na estado y cu si e baby ey a muri, e ta conta como e di 4 morto. Pero Angela a desmenti e informacion ey confirmando cu ningun di e dos damanan tabata na estado, splicando ademas cu a haci autopsia riba e dama en cuestion pa confirma esey. 

E DETENCION 

Tabata dia 12 di oktober 2022 den oranan di mainta( 11’or) cu  polis a detene e chauffeur S. Wilson envolvi den e accidente. Vocero di Ministerio Publico Ann Angela a confirma esaki pa noticiacla e tempo ey. “E sospecho ta doodslag cq dood door schuld’, tabata e cargonan segun e vocero. 

MINISTER DI HUSTICIA 

Na e momento ey, e mandatario responsabel pa husticia, Rocco no kier a drenta detayes riba e caso di e chauffeur pero toch e la duna un comentario breve si. “Den tur caso ta tene cuenta cu ley y maneho. Entre otro si tin vluchtgevaar, si e persona por destrui evidencia etc” e mandatario a cuminsa na bisa di e caso. “Den e cuadro ey decicionnan ta wordo tuma entre Ministerio Publico Y Cuerpo Policial” Tjon a sigui bisa. “ Mi tin pleno confianza cu nan (KPA y OM:red)  lo percura pa e caso aki cana bon y cu Husticia lo cana manera mester ta” e mandatario a sigui bisa. Loke si e mandatario a bisa riba e caso directo, ta cu e la desmenti cu cierto cosnan ‘no a tuma lugar’ pa motibo di overtime. “ Manera ya ta conoci e asunto di overtime no ta conta pa ordediensten” Tjon a bisa, indicando cu esey ta inclui tambe cuerpo policial. 

E ACCIDENTE

E caso ta cu luna pasa mayan (2 di October 2022:red) un accidente feroz entre dos auto na Seroe Colorado a laga 3 persona morto y varios herido. E chauffeur cu lo a ocasiona e accidente a bira un sospechoso pa ‘dood door schuld’ door di Ministerio Publico, y cu e lo wordo atendi cu ne corectamente, cu ta ensera detencion y interogacion conforme ley. Pero e situacion di e chauffeur tabata di tal indole cu e tambe mester a keda hospitalisa prome. KPA a opta pa e persona recupera pa despues tuma e pasonan conforme ley, cu ta encera e detencion.