Noa certifica y cla pa traha y detecta droga y arma

ORANJESTAD – E cacho k9 Noa ta certifica y cla pa traha y detecta droga y arma. Recientemente e manehador di e cacho Noa a ricibi su certificado pa e disciplina di droga y arma, otorga pa minister di husticia mr. drs. Arthur Dowers. Contrario na e otro cachonan ‘trahado’, Noa ta un rasa mas chikito (cocker spaniel) cu normalmente ta wordo uza pa e tipo di trabounan aki. Esey ta haci cu e por funciona den otro trabounan cu e cachonan ‘tradicional’ (herdershond) no por. Entre e bentahanan, Noa por yega mas serca di hende, debi na tanto su naturalesa y apariencia no ‘agresivo’, compara cu e otro cachonan di e ekipo di CEA/KIA.

DETECTA CELLULAR

E mandatario encarga cu husticia a subraya na e occasion aki, cu e ta considera e hecho aki como un adelanto grandi. E team di manehador di cacho (begeleider) y cachonan specialisa ta traha primordialmente den prison. “Lamentablemente mi tin cu bisa cu den prison te ainda nos ta haya diferente cosnan illegal”. Aki e mandatario ta referi na e.o. telefonnan celular y droga. Tin cachonan specialmente entrena pa detecta netamente celular y droga den prison. “Awor nos tin un acerca. Banda di esey nos tin tambe claro e surveillancehonden cu ta traha den prison” e mandatario a sigui bisa.

MAS CACHO

E mandatario a indica tambe cu durante su bishita recien pa St Maarten, e la haya peticion pa algun di e cachonan eynan wordo entrena tambe aki na Aruba pa varios disciplina. E ta spera cu pronto via di Fondo Desaroyo Aruba (FDA), por yega na un acuerdo pa por adkeri mas cacho asina pa aumenta e nivel di seguridad , y logra mes momento un miho cooperacion entre douane, polis y tambe KIA/CEA. E tin e speransa cu tur esaki lo sosode den un tempo cortico, creando asina un arsenal mucho mas grandi di posibilidad pa loke ta capta droga y arma illegal cu ta drenta nos pais.