Otro aeroliña colombiano a anuncia intencion pa bula pa Aruba

BOGOTA – E aeroliña economico colombiano Ultra Air a haya aprobacion di autoridad colombiano pa bula 15 ruta internacional, entre nan Aruba. Asina e portal Aviacion Online Colombia a anuncia dialuna. Conforme e raportahe di e portal, si ta pa e aeroliña, nan lo kier cuminsa bula e ruta Bogota-Aruba entrante 1 di April 2023. E aeroliña hoben di apenas 6 luna di existencia ta bula cu 6 avion tipo Airbus A320 na Colombia y awor kier expande nan mercado. Mientras cu nan a anuncia publicamente cu nan a haya confirmacion di autoridad Colombiano pa bula pa Aruba, aki na Aruba mes cos no ta ‘asina leu’. “Mi por confirma cu nan no a yega cerca nos ainda”, director di Departament di Aviacion Civil (DCA) cu ta responsabel pa e permiso, Edwin Kelly a bisa noticiacla dialuna. Segun e director, tipicamente algun luna prome e aeroliña en cuestion ta acudi cerca DCA pa aplica pa e permiso. Algo cu no a sosode ainda. “Dus na e momento aki nos no por confirma ni desmenti si nan lo cuminsa bula Aruba” Kelly a sigui bisa. Mientrastanto autoridad di aeropuerto di Aruba no por a confirma e noticia tampoco. A compronde cu nan lo ta papiando pero e representante di AAA a prefera di no duna comentario aworaki. 

HISTORIA

E aeroliña a realisa un balansa positivo den su prome 6 lunanan, anunciando cu nan a transporta un total di 693.530 pasaheros y a realisa 5.361 buelo. Mientrastanto entre e rutanan internacional cu nan a solicita pa bula, e basenan lo ta for di Bogota y Medellin, y kier bula pa Cancún en México; Miami (MIA) y New York (JFK) na Merca ; Quito (UIO) y Guayaquil (GYE) na Ecuador; Corsou(CUR) y Punta Cana (PUJ)  Santo Domingo (SDQ) na Republica Dominicana.