SIMAR: Desapunta den minister Hooyboer y mayoria di maestro parlamentario

ORANJESTAD - Sindicato di Maestro di Aruba (SIMAR) ta desapunta den tanto Minister Hooyboer-Winklaar, como den mayoria di maestronan parlamentario. Manera ta conoci, diamars ultimo un cantidad masha grandi mes di maestro y docente rond di Aruba a demostra nan malcontento pa loke ta trato inhusto, intimidacion y falta di respet pa e maestro di scol en general. Tanto miembro como no miembro di e sindicato a sostene e accion inicia pa e directiva di Simar, door di bisti na preto y post potret riba Facebook. Tur hende por a constata pa nan mes, cu e sosten tabata masal y e accion a demostra cu ta obvio cu maestronan ta cansa y harta di e situacionnan cu ta presenta tanto na pia di trabou como pafor di scol.

DIARANSON

Segun e sindicato, diaranson e cherry a ser poni riba e bolo di disgusto, na momento cu Parlamento a trata caso di e maestro di Scol Primario Kudawecha, miembro di Sindicato Simar. E caso aki a haya atencion di publico en general y a haya un rabo largo y sushi, despues cu Minister Michelle-Hooyboer a schors e maestro en cuestion sin cu a sigui procedura, sin scucha tur banda y sin tene un investigacion debido pa por acusa e maestro.

PARLAMENTO

Diaranson Parlamento como organo cu tin tarea entre otro di controla trabou di ministernan, a trata e caso aki. Ta di remarca cu durante e reunion aki, cu a tuma no menos di 16 ora, mayoria di e parlamentarionan presente, tanto di fraccion di MEP, di PDR, como di A a trece dos punto dilanti: E procedura hiba pa minister Hooyboer-Winklaar no tabata corecto y cu e medidanan  contra e maestro, sin cu un investigacion a culmina, no ta na su lugar, segun e sindicato.

SOSTEN

Tur parlamentario cu a toca e dos puntonan aki, incluso 7 di e 8 nan cu tabata maestro di scol, a propone na Minister pa hala su carta di 20 di maart aden, laga e maestro bay bek su trabou y sigui cu e investigacion. Segun e sindicato, tambe varios a trece dilanti cu docentenan lo ta sinti nan mes insigur actualmente, mirando con a trata e maestro aki y e caso. Incluso e punto di cuido, seguridad y sosten di e maestro a culmina den un motion sosteni pa Parlamento completo. Motion cu SIMAR y e maestronan presente a asta recompensa cu un aplauso.

SORPRESA

E sindicato ta sigui mustra cu mirando e tantisimo remarkenan di mal proceder y medida inhusto, un motion a ser presenta pa Minister hala e medidanan atras, laga e maestro bay traha bek y sigui cu e investigacion. Minister Hooyboer-Winklaar a trece dilanti cu e lo laga e maestro bay traha bek, pero cu e lo no hala e carta atras. Esaki a bira su motion cu pa sorpresa di tur maestro y otro personanan den tribuna, tur e maestronan Parlamentario di fraccion di AVP a sostene na momento di vota.

DISGUSTO

Esaki sigur a trece masha disgusto mes serca tanto esnan presente como serca esnan cu tabata sigui e reunion via television. Segun e sindicato, na varios ocacion minister Hooyboer-Winklaar a haya e oportunidad pa tuma posicion y hala e carta atras. Lastimamente e no tabata tin e curashi y grandesa di acepta esaki y tuma e decision cu na parecer di maestronan, specialmente esnan cu a caba di demostra nan malcontento cu intimidacion y abuso, no tabata esun mihor. “ E unico persona di fraccion di AVP cu a tuma posicion y a vota contra tabata Presidente di Parlamento, Sra. Marisol Lopez-Tromp, cu na opinion di Simar a sa di demostra cu su tarea y su voto no tin nada di haci cu su partido politico”

CARTA 20 MAART

Simar ta keda para ariba cu e carta di dia 20 di maart, cu ta contene medidanan rigoroso contra un maestro cu no a ser encontra culpable di loke ta acus’e pe, mester ser hala atras.” Cu ta retene pendiente ta un forma di intimida y absolutamente no ta aceptabel. Mester remarca cu despues di e reunion aki, maestronan a keda masha disgusta y a vocifera na directiva di SIMAR na gran cantidad cu nan ta dispuesto di mustra nan malcontento den mas accion riba e prome dia di scol despues di vakantie. Mas cu claro, pa bienestar di enseñansa en general, directiva ta spera cu esaki no ta necesario” e sindicato ta finalisa bisando.