Cuerpo Policial Aruba ta di luto

ORANJESTAD - Cuerpo Policial Aruba ta di luto. "Perde un colega semper ta bin cu sentimento di tristeza y dolor. Pero esaki toch ta toca mi personalmente pasobra ta precisamente un colega cu nos a studia hunto na Aruba y a drenta Cuerpo Policial hunto na aña 1989", Adolfo "Dolfi" Richardson, Alto Comisario di Cuerpo Policial Aruba a cuminsa relata riba e fayecimento tragico di Andre Solagnier.

EVENTO SPECIAL

No tabata mas cu algun siman pasa cu a tene un evento special pa e Polisnan cu a cumpli 25 aña di servicio, den cual klas di 1 di augustus 1989, tambe ta inclui Andre Solagnier. E evento ey tambe tabata special pasobra Alto Comisario Richardson mester a entrega reconocimento y decreto di 25 aña di servicio na su mesun coleganan cu a cuminsa hunto cune den Cuerpo. Tabata momento di masha orguyo pa e constata cu despues di 25 aña, e mes ta dirigiendo e Cuerpo di Polis pero cu mayoria di su coleganan tambe a forma un bunita carera den e organisacion policial. Entre e grupo aki tambe tin Andre Solagnier, cu a sa di ocupa varios funcion den Cuerpo Policial, entre otro e seccion di Polisnan motorisa, pero cu pa e ultimo añanan ta trahando den e departamento di "Centrale Post". Den e funcion ey e tin contacto cu mayoria Polis durante di warda y de facto, ta esun cu ta dirigi e operacion riba caya, pues un trabou carga di responsabilidad di cual su experencia ta esencial. Diadomingo ultimo el a traha 8:00am pa 4:00pm y lo mester a traha mesun cos riba dialuna. E Polisnan cu a comunica cune riba Pasco Grandi nunca por a pensa cu esey tabata pa ultimo biaha.

LUTO

"Nos ta di luto awe pa perdida di Andre. Mi no por imagina e dolor aki pa su señora, yiunan y famia cu tanto ta stim'e. Mi ta expresa mi palabranan di forsa tambe na su ruman Rene, un otro colega di nos, cu tambe ta den dolor awor pa e perdida repentino aki. Como Polis nos ta mas uni cu nunca", asina Alto Comisario mr. Dolfi Richardson a enfatisa.

PROTOCOL DI MORTO

Entre tanto, di acuerdo cu e protocol di morto, a decreta luto oficial den e organisacion policial. Esey ta encera cu ta hisa bandera "halfstok" na tur edificio di Cuerpo Policial Aruba y ta cancela tur evento social cu lo por tabatin planea den e dianan nos dilanti. Mando Policial a dicidi tambe cu Andre Solagnier lo haya un entiero oficial di Polis e siman aki, riba e dia cu famia scoge.

RICHARDSON

"Nos ta un organisacion hoben, cu hopi reto pa atende cune, tanto esunnan den nos man como retonan for di nos mannan. Ora e tipo di realidad nan asina presenta, e ta corda nos dicon nos tin cu traha hunto, dicon nos mester ta uni, dicon nos mester biba bon cu otro, pasobra bo nunca sa ki dia y ki ora bo tarea na e mundo aki ta termina. Mi ta sigur cu nos bon Dios tin un miho tarea pa Andre awor ayariba, na unda sigur e lo sigui guia nos y brinda siguridad na henter nos pueblo", asina mr. Adolfo "Dolfi" Richardson a termina bisando.