Banco Central Europeo a bolbe aumenta interes fuertemente contra inflacion

BRUSELAS – Un biaha mas Banco Central di Europa (ECB) a aumenta e tasa di interes, pa bringa e inflacion haltisimo na Europa. E tres tasanan di interes mas importante ta wordo aumenta cu 0.75%. Esey ta mesun aumento compara cu e ultimo aumento di e tasa na september. Den tres luna di tempo e tasa di interes a wordo aumenta cu 2% y esey ta e aumento mas scerpi y agresivo den historia di ECB. Aumentando e interes, Banco Central ta spera cu e crecemento economico tranca y e aumento di prijs debilita. Na Hulanda e inflacion na September a yega 17.1%. Den tur pais europeo hunto e inflacion promedio ta 9.9%.