Agente policial a perde su bida den accidente fatal na Paradera

ORANJESTAD - Dialuna algo pasa di mey anochi Aruba a conoce su di 4 morto den trafico. Esaki ora cu  a sucede un accidente cu a resulta fatal pa un motorciclista na Paradera. Un poco pabou di Anytime Bar Restaurant na Paradera, un agente policial riba su Harley Davidson preto MFA 737 tabata biniendo di pariba. Y na dado momento pa un of otro motibo, e la perde control y dal contra un cura di cas y keda gravemente herida. Mesora a pidi pa presencia di ambulance y polis. Na yegada di ambulance ya e victima no tabata duna señal di bida mas. Mesora ta pidi pa un dokter pa bin na e sitio. E agentenan policial na e sitio a bin nota cu ta trata di un colega di nan, cu a pone cu mesora a avisa nan superiornan y a pidi pa specialista di trafico, y slachtofferhulp pa yega na e sitio. E sitio a keda cera pa mas investigacion, ta trata di agente policial Andre Solagnier, cu tabata traha como centralist na Centrale post di Polis. NoticiaCla.com ta manda palabra di condolencia na famia di e fayecido.