Riba di dos dia, un hues irita a drill sospechosonan y abogadonan den caso Avestruz

ORANJESTAD – E caso penal Avestruz a continua diamars mainta den sala di Corte na Aruba, cu e hues hulandes (bula specialmente for di Hulanda cada bez) notablemente irita compara cu e dia anterior y cu ningun intencion di laga hende tum’e haci den su sala di corte. Esaki debi cu mescos cu ayera, tabata parce cu algun sospechoso a haya ‘amnesia’ diripiente y a momentos, mientras otronan tabata purba baila e hues cu contestanan y comentario  cu segun e magistrado, no tabata al caso. Asina mes e la dirigi su caso cu man duro, causando e biaha aki iritacion cerca varios abogado. 

NO TA DUNA ESPACIO PA BASILA

Loke esaki tabata nifica, ta cu e hues, contrario na otro huesnan, no tabata duna e minimo di espacio pa un abogado of un sospechoso interumpi, of papia algo sin a wordo puntra, of simplemente ta contesta algo cu no ta relevante. E hues tabata asina skerpi cu e no tabata laga ningun hende drenta den ripiticion, of purba tuma e hues haci, describiendo cierto scenario of situacionan, indicando cu su contestanan sarcastico, cu e no a nace ayera. 

ABOGADONAN Y OM NO TINE NADA FACIL

Loke esaki ta mustra ta cu unabes cu e abogadonan ta na turno, nan lo no tine facil ya cu e hues no ta permiti ‘basilamento’, of ‘verhaaltjes’. Abogadonan tabata notablemente irita riba e hues, ora cu segun e abogadonan, e hues tabata interpreta cierto comentario, interumpiendo e declaracion di e sospechosonan, of tabata para abogadonan ora cu esakinan tabata haya necesario pa interumpi e hues ora cu nan tabata haya cu cos tabata bay mucho leu. “Awor no. Bay sinta. Bo lo haya suficiente tempo pa papia. Awor no” e hues tabata bisa. Hasta sospechosonan no tabatine facil cierto momento ora cu nan tabata purba papia, fuera di momento. “Awor no!”. Hasta ora cu fiscal tabata purba toca temanan cu tabata bay leu, of no alcaso, e hues tabata para nan y bisa nan pa keda na e tema. Un hues dificil, cu a mustra cu e tin control den su corte. Cu e tin demasiado control of no, ta keda pa interpretacion.