Hues: Ta mustra cu Arends a haya trato preferencial di gobierno pa haya tereno

ORANJESTAD – Den tratamento di awe di e caso Avestruz, e hues a enfoca riba e compra y benta di e compania Elenath  Development & Contractor VBA, y e tereno(nan) cu tabata envolvi. Pa cu e compania aki, e hues a interoga dos di e sospechosonan L. Arends y su yiu R. Richardson nan envolvimento.  Loke a sali for di e tratamento tabata e rapidez den cual Arends via e compania aki a keda cla pa haya opcion riba su tereno(nan). Unabes cu tur cos tabata cla cu e proceso di tereno, tabata cuestion di un siman cu Benny Sevinger, e mandatario en cuestion e tempo ey a firma un concepto di MB y manda esaki pa Arends pa e keda cla. Den e relato aki ta trata e comienso di e compania y den un otro relato, e rapidez cu e tramite a tuma lugar. 

DOÑO DI ELENATH

A keda estableci den corte cu e sospechoso R. Richardson (yiu di sospechoso Arends) a keda apunta director di e compania Elenath algun tempo despues (entre 4 y 6 luna:red)  despues cu e mama, L. Arends a cumpra e compania di un otro persona pa e suma di 45 mil florin. Esaki  segun declaracionan haci den corte, entre hues, abogadonan, sospechoso y OM. For di comienso e hues tabata irita caba, pasobra e sospechoso Arends a opta pa no contesta cierto preguntanan di e hues, evitando asina cu e hues por a haya claridad, segun e magistrado. Cada bes cu esey sosode, e hues tabata splica e sospechoso en cuestion cu esey ta pone cu no por haya claridad riba cierto caso y cu cierto ponencia ta keda vigente. “Esey ta bo opinion” e sospechosonan Arends y Richardson ,-cu na varios occasion a opta pa no contesta pregunta-, tabata contesta e hues. “Esaki no ta mi opinion, sino mi observacion”, e hues tabata contesta e ora. 

KEN TA DOÑO Y KEN TA DIRECTOR

Na comienso di e mainta debi cu tanto Arends como Richardson no kier a papia, tabatin dificultad pa saca afo kico e envolvimento exacto tabata di ambos persona. Na final ora cu nan a opta pa papia toch aunke limita, a resulta cu ta Arends a cumpra e compania Elenath  Development & Contractor VBA na januari 2014, y a haci su yiu R. Richardson e director, mientras cu Arends mes tin tur e accionnan di e compania. E hues (y despues tambe fiscalnan di ministerio publico) tabata kier sa pakico Arends mes no a bira director, y a opta pa pasa esaki pa su yiu, cu no tabatin e experiencia necesario. Segun Arends, mientras cu ayera e la bisa cu ta pa mantene su nomber pafo di publicacion ya cu e tabata cansa cu ta lastra su nomber publicamente politicamente y tilde su afiliacion na un partido, awe e la bisa cu e kier a duna su yiu e chens pa cuminsa su ‘carera’ comercial y sa kico y con e mundo aki ta biba. 

NO TA CORDA

Loke tabata remarkable pa e hues, ta cu ora cu e la cuminsa puntra e yiu, esaki tabata contesta cu e no tabata corda mucho cos. A hacie un serie di pregunta basico, manera kico su funcion tabata, kico e tabata haci durante dia, y esaki a wordo haci pa sa si e tabatin conocemento di e negoshi of no. Fuera di bisa kico su tareanan tabata, e tabata bisa di no ta corda su accionan diario, cu ken e tabata deal etc, cu dado momento a irita e hues. Segun e hues su argumento, si bo tin solamente un negoshi y no tin dje hopi responsabilidad, bo mester por corda cierto cosnan, indicando cu e no tabata kere e palabra di e yiu di Arends. Dado momento, e yiu no a gusta e asunto y  a opta pa keda keto y bisa hues cu e no ta contesta ningun pregunta mas.

HIJASTRA

Dado momento ora cu ministerio publico a referi na e yiu como e ‘hijastra’ di Arends y no yiu adopta, e abogado Arends-Marchena  ‘su fuse’ a bula y a reclama e fiscal pa por fabor stop di referi na e yiu asina, algo cu a sosode tambe durante e periodo di e interogacion di e yiu ora cu e tabata deteni. “Mi kier bo stop mesora cu e referencia aki, ya cu esaki no ta corecto y apropia’, abogado Arends a reclama na e fiscal, cu a keda sorprendi, y mesora a cambia su tono. 

INTERMEDIARIO

Un biaha mas, manera un dia prome, Arends a referi na su consehero financiero A. Lin cu den caso di e compania Elenath tambe tabata esun cu a busca e ‘inversionista’ cu a resulta despues di ta e cumprado, unda cu e cumprado a paga Arends mei miyon pa e compania. E suma inicialmente tabata dificil pa Arends recorda, pa iritacion di e hues, cu tabata mustra cu un suma asina bo no por lubida. “Bo a haya un ganashi grandi!” e hues a bisa Arends den un tono sarcastico. Dado momento e hues a cuestiona Arends pa su forma di interpreta su mes, tirando culpa (manera un dia prome) riba su consehero financiero y e abogado cu e consehero a usa, pa asina e saca su curpa pa asina mustra su inosencia. “Mi ta teme cu bo ta actuando un poco demasiado optimista” e hues a bisa Arends e ora. “Bo ta haci como si fuera bo ta inocente” e hues a sigui bisa. “Bo kier a simplemente bende e compania y ningun momento tabata busca inversionista” e hues a bisa Arends tambe.    

TRANSACION DUDOSO 

Hues a cuestiona e transaccion dudoso di e minister, cu a firma un MB sin seyo, sin stempel. “Ki bo ta pensa”, hues a puntra Arends, cu a opta pa no contesta e ora. Esaki pasobra segun Arends, mas prome e hues a prohibi’e pa referi na su documentonan, cu ayudo di su abogado. “Mi no tin beneficio di esey. Mi tambe tin e documentonan ey. Bo no mester lesa nan pa mi” e hues a sigui splica Arends indicando cu e kier pa Arends mes for di su palabranan splica kico e sa y ta corda. “Mi no ta papia cu papel, mi ta papia cu hende”. Ora cu Arends a bisa e hues cu esey ta su opinion, e hues a bisa cu un tono sarcastico, ‘No ta mi opinion. Mi ta constata!”. 

SKIP DIP Y BAY STRAIGHT CERCA MINISTER

Ora cu hues a sigui puntra Arends pakico e no a bay DIP y a opta bay bay directament cerca e minister, Arends un biaha mas a haci uso di su derecho di silencio. No obstante esey, hues a sigui puntra Arends, riba p.e e hecho cu e la gana 550 mil di ganashi pa a bende e compania, di cual e la usa 65 mil pa drecha su dak. “Bo tin recibo pa esaki?”, y atrobe Arends a opta pa keda keto.