Avestruz: Sospechoso ta keda cla cu tereno den un siman, mientras otronan ta warda aña largo

ORANJESTAD – Durante tratamento di e caso Avestruz diamars, e sospechosonan F. Every y F. Abath mester a duna cuenta na e hues tratando e caso, riba nan envolvimento di e transaccionan di tereno erfpacht, considera como dudoso den wowo di husticia. Tambe a purba establece e relacion entre e sospechoso Every (e tempo ey hefe di oficina di tambe sospechoso, ex minister Benny Sevinger) y e sospechoso L. Arends. E tema tabata trato preferencial cu e sospechoso Arends lo a haya den e proceso di tereno erfpacht, for di gobierno. 

INCONSISTENCIA DI STORIA

Despues di un intercambio entre hues, Every, Sevinger y Abath, e hues a constata cu tabatin ‘discrepancianan’ entre nan declaracionan y a purba haya claridad riba esaki. Varios biaha e sospechosonan tabata contradeci otro y nan mes, despues cu hues tabata haci pregunta similar na diferente forma na e sospechosonan. P.e. un biaha un tabata conoce e otro, pero despues ta resulta cu esey no tabata e caso, of cu nan a compronde e pregunta robez, of esun mas usa, esta cu ‘no tabata corda mas’. 

RELACION EVERY-ARENDS-ABATH

Durante e interogacion, e hues a establece cu Arends despues di no tabata yega leu cu DIP pa su papelnan, a dicidi di cana e caminda mas sigur, esta bay directamente cerca minister e tempo ey. A cuestiona Arends detayadamente con esey a bay, pa e por a establece ‘con facil’ ta pa yega te na porta di e minister y su oficina’, siendo cu tin miles cu ta pega cu nan tereno y cu tin añanan largo cu nan no por haya un pida tereno. A establece cu Arends a haci un solicitud pa papia cu Every, cu na su turno a ricibi Arends y conoce personalmente. Every, segun e mes ta conta, a dicidi di ‘yuda’ Arends cu un asina yama carta concepto pa tereno cu cual e mester continua su caminda pa DIP (atrobe pero e biaha aki mas lihe). Hues a purba establece e forma con facil Arends por a yega te na Every, siendo un persona asina halto di funcion, mientras cu otronan tin cu warda largo y nunca lo tin e suerte di yega te cerca Every. Tambe a cuestiona e hecho cu Every a opta pa yuda Arends cu e ‘concept brief’ , puntrando Every si ta tur hende e ta yuda asina cu carta, of ta simplemente Arends. Every a purba saca su curpa, tratando di convence hues cu e la dicidi di yuda Arends pasobra Arends su hulandes no tabata fuerte. Despues Every a presenta un version con e no ta yuda tur hende, den su defensa, pa mustra cu e no a haci nada malo yudando Arends si y otronan no. Fiscal dado momento a bolbe confronta Every cu e asunto aki, pa stipula atrobe con lihe Arends a yega cerca Every y con Arends a si a logra haya un carta traha pa Every mientras cu otronan no tin e mesun ‘suerte’.

ARENDS CONCIENTE DI SU SUERTE

Hues a sigui puntra Arends si e ta conciente di e suerte cu e tin cu e la keda cla asina lihe, mientras cu otronan no tin e mesun suerte. Y cu e por compronde cu henter e proceso aki, ta mustra di ta ‘trato preferencial’ ta bin na mente cu e forma di proceder aki. 

SPOED

Loke tambe a hala atencion den corte ta e hecho cu un carta pa trata e proceso di tereno pa Arends, a bin cu un stempel marca SPOED (Urgente), cu tambe ta cuestionabel segun e hues. Ora cu e hues a purba saca afo ken di tur tabata responsabel pa e SPOED aki, a resulta cu ni Every, ni Abath, ni e ex minister tabata responsabel. Por lo menos segun cada un nan version. “Un hende mester a pone e stempel ey. E no por a cay for di shelo” e hues a cuestiona e tres sospechosonan. E momento ey Sevinger diripiente a sugeri cu e culpa por ta riba DIP, indicando cu ta na DIP un hende lo mester a stempel SPOED riba e carta. 

OM TA INTEROGA EVERY

E ora fiscal a sigui pa interoga Every, riba su interaccion cu su hefe di e tempo ey, esta ex minister Sevinger (tambe sospechoso den e caso aki:red). Segun Every a splica OM, a bisa Arends cu e mester sigui e proceso via DIP pa keda cla cu su tereno. Every sinembargo ta desmenti esey. E tabata mustra cu tabatin hopi keho na su oficina di hendenan cu tabata reclama cu Arends si tabata haya tereno mientras cu nan no. Esey Every a admiti. Aki hues a cay aden, puntrando si Every tabata discuti e asuntonan aki cu Sevinger tambe. Fiscal a sigui drill Every, y a cuestiona su funcion y tabata kier a sa exactamente kico su rol tabata. Loke realmente OM tabata kier sa si Every su tarea tabata pa traha un carta (concept brief) pa tur hende cu e yuda, of ta pa Arends so e la haci’e. Aki Every a purba defende su curpa, desmintiendo cu e la hacie pa Arends so y cu e la yuda algun persona otro tambe, pero no hopi. 

YAMADA

Dado momento Fiscal a confronta Every cu e hecho cu e ta desmenti di tabata conoce Arends bon, siendo cu tin yamadanan haci (trace) di un cantidad di yamada entre Every y Arends. Every y Arends a admiti cu tabatin yamada haci, pero tabata varia. Mayoria yamada tabata cortico, unda cu Arends tabata kier sa con ta para cu su proceso di tereno. Otro yamadanan, segun Every, tabata relaciona cu e trabou cu Arends tabatin pa e oficina ey, unda cu e tabata encarga cu marketing di e proyecto Bo Aruba, un proyecto di e gobierno di e turno ey. 

ARENDS TA FASTIOSO

Loke a trece poco ‘hilaridad’ den corte ta ora cu fiscal a confronta Every cu un parti di su interogacion cu Landsrecherche, unda cu e lo a declara cu Arends tabata fastioso. Aki Every a admiti den corte cu e la bisa esey di Arends, pasobra ‘Arends tabata cans’e’ constantemente riba e asunto di tereno y Every no tabata gusta esaki. Riba e hecho cu Arends lo tabata enamora di Every y pesey e tabata yama asina hopi, Every a reacciona cu e tambe a tende di e rumornan aki pero cu esey ta puro rumor. E parti aki, na final a causa basta hilaridad den sala di corte.