Sevinger: Si tabata sa cu e lo a haya problema legal, e lo no a aproba tur opcion pa tereno

ORANJESTAD – “Si mi tabata sa cu mi lo a termina aki (dilanti mesa berde:Red), mi lo a haci’e otro. Asina e ex minister di infrastructura Benny Sevinger a contesta hues dialuna mainta ora cu e caso penal Avestruz a continua. E ta referi na su maneho d e tempo ey unda cu e tabata aproba tur peticion pa tereno erfpacht cu tabata aparece su dilanti. Sevinger a keda ripiti cu su maneho tabata pa asina e no wordo tilde di preferencia politico. Su comentario pa cu su firma y comentario ‘popular’ ‘Dezerzijds akkoord, gaarne uw medewerking’ pa Sevinger, no tabata un sigur garantisa y no tabata nifica, dal bay. Pa Sevinger e kier men cu e no tin obhecion, pero ta keda na DIP pa check un ke otro y dicidi finalmente. Problema ta cu awe e ex director di DIP F. Abath a contradeci Sevinger y bisa cu pa nan, su firma tabata un “OK’ final. 

INTERPRETACION DI DIP

“Nos interpretacion ta cu minister a bisa ‘akkoord’ pues e ta ‘ok’, y (nos) ta cuminsa procesa esaki” Abath a contesta hues. Problema ta pues cu ora cu hues a puntra e ex mandatario kico su firma kier men, e ora, atrobe e ex mandatario a sigura cu su ‘akkoord’, no ta un aprobacion final sino cu e no tin ningun problema pa e wordo procesa. Ora cu hues a confronta Abath cu esaki, e ultimo tabata para ariba cu un ok di minister kier men cu mester ehecuta esaki. Dado momento Ministerio Publico a cay aden, purbando di clarifica e asunto. Esaki pasobra tabatin un problema di interpretacion entre e minister y DIP pa loke ta e asunto di ‘akkoord’. Tanto e ex mandatario y e ex director di DIP na final a admiti cu nunca a sinta pa aclarea e ‘diferencia aki’. 

STEMPELMACHINE

Den e tratamento anterior, hues a label e ex mandatario como un ‘stempel machine’ pa e forma con e tabata anda cu e asunto di tereno. Awe e la cuestiona Sevinger mas severo. E la puntra e ex mandatario pakico e no a cambia e structura ya cu obviamente e structura aki no ta uno corecto y ta claramente previligia un grupito. Sevinger a purba saca su curpa, splicando e hues cu ta asina cos ta bay na Aruba y cu asina e la conoce e sistema y no sa otro. Pues cu e persona ta opta pa bin cerca dje prome y despues e proceso ta sigui na DIP. E hues a reclama cu tin un grupo di persona cu a reclama cu nan tin 20 aña ta reclama cu nan no por haya tereno cerca DIP. Hues a splica e ora cu mirando e situacion e ora, ta mas cu logico cu hende ta bay straight cerca e minister, pasobra un bishita cerca e minister, ta un siguransa cu su caso ta wordo trata automaticamente mientras un bishita na DIP no. Aki ta unda cu Sevinger a admiti cu si e tabata sa cu e lo a haya su mes den problema legal asina, e lo no a hacie asina y manda tur hende pa DIP directamente.