Hues: Comerciante ta pidi tereno, haya ok, y despues ta lanta compania

ORANJESTAD – Un comerciante a haci peticion pa opcion pa tereno erfpacht cerca ex minister di infrastructura Benny Sevinger, e ex mandatario a duna su ok y manda esaki pa Directie Infrastructuur en Planning (DIP) pa procesa. Problema ta cu e comerciante a haci e peticion na e ex mandatario, siendo cu ta un luna despues numa e comerciante a lanta y inscribe su compania bou di cual e peticion ta registra. Asina hues dialuna mainta a cuminsa na cuestiona e asunto aki na e sospechoso L. Arends cu awe tabata den corte pa continuacion di e caso Avestruz. “Kico mi mester pensa di esaki?” e hues a puntra Arends , cu a opta pa no contesta inicialmente. 

ASINA E CASO A CUMINSA 

Corte dialuna mainta a continua cu e tratamento di e caso penal Avestruz, reparti den varios seccion. E intencion tabata pa trata e ‘sub casonan’ Deshaun NV y Elenath NV hunto awe, pero hues a opta pa solamente trata Deshaun NV awe y e otro diamars mainta. E actornan principal pa awe tabata ex minister Benny Sevinger (infrastructura), comerciante L.Arends, ex director di DIP F. Abath, y ex director di Deshaun NV, M. Winterdal (cu tabata presente via coneccion di video for di Zwolle, Hulanda). 

For di comienso di e caso, a nota cu e sospechoso Winterdal tabata hopi emocional y no por a ni papia. Ora cu hues a cuminsa interog’e y no tabata yega leu, abogado a intermedia pa pidi pa no continua mirando su estado emocional. E ora e interogacion a continua cu e otro sospechonan.

NO TA CONTESTA

Ora cu hues a cuminsa cuestiona Arends, esaki a opta inicialmente pa no contesta preguntanan, argumentando cu e la pasa den 7 interogacion caba pa landrecherche, y cu e ta mantene na e declaracionan anteriormente haci. “Cu otro palabra, bo no ta bay contesta mi preguntanan” hues a sigui bisa. E la remarca si cu Arends mester a compronde cu e tin cu haci su trabou y haci pregunta, pero no por considere como un di 8 interogacion. Asina mes e hues a mustra cu Arends tin derecho di keda keto. 

ABATH Y HUES

Hues a sigui pa e ex director di DIP, y un biaha manera e biaha anterior, a cuminsa cuestiona e proceso di ricibi peticion pa tereno y con esaki ta wordo atendi entre DIP y un minister. Hues a referi specificamente na un peticion cu Abath a ricibi di minister na October di 2015, cu un firma di e minister, unda cu e minister ta duna su approbacion. Specificamente e minister a firma ‘Dezerzijds acoord, gaarne uw medewerking’. Tabata trata un peticion pa un tereno di mas di 5 mil m2 pa metanan comercial. Segun Abath, nan interpretacion di e cartanan di minister asina, ta cu e minister a aproba esaki y cu nan tin cu ehecuta esaki. Den un otro raportahe ta toca e tema specifico aki.  

DESTINACION DI E TERENO

Un otro punto cu a keda trata, ta e destinacion di e tereno. Tabatin un confusion pasobra inicialmente Deshaun NV a haci peticion pa opcion pa 1 (un) tereno, mientras cu na final e la haya dos. Hues riba insistencia a cuestiona esaki, pero aki Abath a sigura cu no tin nada mal cu esaki y cu na caminda por haci cambio riba e destinacion di e tereno, esta cu si p.e. a pidi e tereno pa traha un centro comercial ariba, cu despues ta cambia esaki pa p.e. pone apartamento. Den e caso aki ta trata di un tereno destina pa apartamento y lo kier of a cambia esaki pa carwash. E ex director di DIP a mustra cu p’e, un carwash ta un negoshi com cualkiera y cu por haci cambio di destinacion. Pues si prome tabatin destina pa p.e. apartamento y ta cambia esaki pa carwash, esaki no ta un problema. E ex mandatario ora cu e la keda confronta cu e ‘discrepancia’ aki, a splica cu loke e por saca afor ta cu hopi biaha tin un tereno den wega, pero cu  e tereno por ta parti den mas tereno chikito, y ta considera esaki como parti di otro aunke cu tin mas cu un number di tereno, pues nada inusual. Ora cu hues a puntra Arends riba e parti aki, riba e confusion di 1 of 2 tereno, e la opta un biaha mas pa keda keto y no papia.