Awe dialuna caso penal Avestruz cu ex minister Sevinger ta continua

ORANJESTAD – Awe dialuna mainta e caso penal grandi Avestruz contra e.o. ex minister Benny Sevinger ta continua den corte di Aruba. Corte a reserva e prome 3 dianan di e siman aki, pa trata e caso cu por lo menos 6 sospechoso, reparti den dos pa tres sub caso. Manera cu Noticiacla.com a recorda siman pasa caba, ta trata e biaha aki di e sospechosonan L. Arends, F. Every, F. Abath, R. Richardson, E. Winterdal y Benny Sevinger. E subcasonan e siman aki ta haya e nombernan Elenath y Deshaun. Manera cu ministerio publico a presenta anteriormente, e caso Avestruz ta trata di un cantidad di persona, considera como sospechoso cu a haci fiesta cu soborno, falsificacion y estafa, tur pa por haya tereno riba lugarnan prominente. Pa tin un bon bista di tur e actonan, Ministerio Publico a reparti e caso Avestruz den varios sub caso, cu cada uno un nomber diferente (p.e. Elenath y Deshaun). Ta trata cada uno di transaccionan di tereno riba varios parti di e isla, den e caso aki terenonan na Wayaca y Eagle Beach. Mayoria di e casonan ta trata e forma con a usa medionan illegal pa adkeri e terenonan aki, a cambio di algo otro y lo cuminsa e tratamento for di 8’or y mei y tin tres dia reserva pa trata tur e 6 sospechosonan aki. 

CASO DESHAUN 

E caso Deshaun ta trata estafa di pais Aruba entre februari 2013 y 2017, pues henter un termino di un gobierno (Mike Eman II) . Segun OM, den un forma falso y hopi astuto, y of actonan engañoso, pais Aruba a entrega bienes y tereno di erfpacht. “Den esaki sospechosonan Sevinger, Abath, Winterdal, Arends y Richardson tabata participle den varios forma.Tabata haci peticionan incorecto cu no tabata cumpli cu condicionan valido y cu cual falsamento a crea e intencion cu e sospechosonan ak lo a bay desaroya un proyecto riba terenonan na Wayaca” e fiscal a sigui bisa. E peticionan aki tabata ,-contra tur regla vigente y mientras cu nan no tabata vumpli cu e rekisito,- aproba y despues confirma pa medio di decreto ministerial. 

CASO ELENATH

Den e caso Elenath tambe tabata trata di estafa den e mesun periodo y mesun practica. Aki sospechosonan Sevinger, Abath, Winterdal, Every, Arends y Richardson tabata envolucra den varios forma. E diferencia tabata cu aki tabata trata terenonan na Eagle Beach.  

CASO DESHAUN/ELENATH

Den e caso aki, sospechoso Arends, a haci su mes culpable na falsificacion di firma door di haci uso di varios documento falsifica manera peticion di permiso cu tabata parse peticionan pa derecho di erfpacht den e dossier Deshaun/Elenath.  

PROCESO

Loke lo sosode, ta cu en corto OM lo presenta e cargonan, pa despues huez haci pregunta na e personanan en cuestion manera cu a sosode cu e prome dianan di e caso na September ultimo. Notable ta cu durante transcurso di e tres lunanan cu e caso a keda programa, Sevinger ta e unico cu mester ta presente riba tur e dianan aki.