Minister Thijsen si ta convenci cu Aruba lo logra surplus riba presupuesto 2023

DEN HAAG  – Si Premier Wever di Aruba a bisa algun luna pasa cu e no ta kere cu Aruba lo logra e surplus di 1% riba presupuesto 2023 y a participa esaki na Hulanda incluyendo CAFt, awe mainta e minister plenipotenciario Ady Thijsen diabierna mainta si ta pensa cu Aruba ta bay logra esaki. Esey e la bisa diabierna mainta despues di e reunion di RMR. Segun e mandatario, e ta convenci cu mescos cu Aruba na 2020 a yega na un surplus, esey tambe lo ta e caso na 2023. Esaki tambe ta debi cu Aruba su turismo ta bayendo hopi bon, sin conta cu lo bai bin otro desaroyonan economico cu por acelera economia di Aruba. 

CONTENTO 

Minister Thijsen a bisa di ta contento cu e decision cu RMR a tuma di no duna Aruba e aanwijzing aki. ‘Mi a bisa semper na comienso di e proceso aki cu nos mester keda positivo; tin diferencia di opinion, pero esey ta normal. Van Huffelen a duna espacio y nos ta haya cu esey ta nesesario tambe pa nos por splica otro e diferencianan. E decision di RMR pa no duna Aruba un aanwijzing ta hopi bon. Nos ta sigi verder y van Huffelen a bisa cu nos ta bai awor pa 2023. Mi ta convenci cu nos ta bai logra esey tambe,’ asina Minister Thijsen a bisa.

DEBE

E mandatario a sigi bisa cu si por mira na comienso di e proceso unda Gobierno di Aruba na 2017 a haye confronta cu un debe grandi y na 2020 a logra yega na un surplus riba e presupuesto. Minister Thijsen: ‘Pero e pandemia a trece cune cu a bin debenan grandi. Loke e Secretario di Estado ta referi na dje ta debenan cu Aruba a haci pasobra mester a fia placa di Hulanda pa sobrebibi e pandemia, mescos cu hopi otro pais na mundo. Un punto importante ta y mi ta kere cu esey a convence Hulanda tambe con un pais como Aruba cu a bai plat door di e pandemia, mester a fia hopi placa di Hulanda. Nos a baha 128 miyon di nos deficit den dos pa tres aña pa casi nada; pa 25 miyon. Bo ta mira e esfuerso grandi cu Aruba a haci; un trabao inmenso y mi ta kere cu Hulanda sa esey tambe. Pesey nos ta gradici nan tambe pa e comprencion ey. Semper nos ta keda traha hunto y asina demostra cu Aruba ta un pais madura.’ Potret ta cortesia di Arubahuis